Shillong, Iaiong 02: Ka Seng Hynniewtrep Youth Development Council ( HYDC) ha ka 2tarik ïaiong ka leit iakynduh ia u CEM ka KHADC u Bah Shemborlang Rynjah halor ka mat ban dawa pyntreikam ia ka Minimum Wages Act ka dor bai bylla sngi hapoh ka Sixth Schedule ba la thaw da ka Sorkar Jylla.
Haba kren sha ki lad pathai khubor na ka liang u President jong ka Hynñiewtrep Youth Development Council u la ong kum ka Seng ka don ka jingsngewkhia haba iadei bad ka Jingbym ioh kam ki khynnah samla khasi .
U la ong lyngba kane ka Executive Committee ba thymmai ka la pynpaw ba kan nym ai trading license shuh ia ki Dkhar ha kino kino ki kam kiba u khasi u lah ban trei .
Na ka liang ka Seng ka kyntu ba ia kito kiba la ioh ia ka trading license, ka District Council ynda pynthymmai biang ia ki license ka dei ban buh 70 na ka 100 kiba trei ki dei ban long ki trai ri trai muluk bad ym dei ban ai trading license shuh .
U la bynrap ka District Council ka dei ban pyntreikam ia ka Minimum Wages Act ba la thaw da ka sorkar Jylla lyngba ka Labour Department kaba long 525 tyngka ka bainong shisngi dei ban ioh ki nongbylla sngi ba hap hapoh ka Sixth Schedule .
