Shillong, Nohprah 17: Ka seng Khasi Student Union ha ka jingialang jong u President u samla Lambokstarwell Marngar bad ki nongkit kam ka seng ha ka jingiadon lang u bah Samuel Jyrwa shongknor ka North East Student Organisation kila leit sha ka shnong Umsaw Lumdorbar ha khappud Assam kaba hap hapoh ka Raid Nongtung ha Ri Bhoi District ha ka 16 Tarik Nohprah 2025 ban pynshngain ia ki paidbah nongshong shnong kiba don 32 tylli ki iing.
Haba kren ha ka jingialang u samla Lambokstarwell Marngar u la ong ba ka Seng kam dei ba ka wan ai skhim ne ban kular kino kino ki kam pynroi hynrei ka seng ka leit ban ai mynsiem ia ki nong shong Shnong jong ka Shnong Umsaw Lumdorbar ba kin don ka jingshong shñiang hala ka jong ka Shnong bad naka liang ka Seng kan iaidon ha syndah jong ka Shnong lada don kano kano ka jingeh naka liang ka seng kan kner ka jingiarap sha ka ka Shnong.
Lah ban pynkynmaw ba kane ka shnong ha ka 6 tarik Naitung 2005 kala shah thombor bad kala wanrah ia ka jingshong syier, dei na kane ka daw ba kane ka jingleit ka KSU sha katei ka shnong ka long ban ai mynsiem ia ki paradoh parasnam kiba sah ha katei ka thain.
Kiwei ki dkhot ka seng kiba la don lang ki long u vice President ka Seng kmie u Samla Biangbor Paliar u President ka NKHD Unit u Samla Ferdynald Kharkamni nangta u President ka Synjuk ka Raid Nongtung u Bah Sohtun u Rangbah Shnong ka Shnong Umsaw Lumdorbar u Bah Donkupar Sten u Secretary Shnong u Bah Khrawbor Lyngdoh, ha kane ka sngi la don ruh ka jingpynlait ia ki dohkha ha wah kaba don ha katei ka shnong.
