Shillong, Lber 12: Ka Deputy Commissioner jong ka East Khasi Hills District ka kong R M Kurbah kala ong ba la ioh ia ka jingtip ba kala don ka jinglum musur ha ka Hima Nongspung da kaba buh ia ka khyrdop ka shnong Mawjongka ha surok ban leit na Nongspung sha Sohiong.
Ka DC kala ong ba ka sorkar Meghalaya kala shim ia ka rai ba kan nym ailad ban don ki khyrdop ban khrong musur ha ki surok ban khrong beain, kane ka jingkhrong pisa beain ka ktah ia ka leit ka wan ki kali bad ka wanrah ia ka jingiatyngkhuh kali.
La ong ba katkum ka hukum jong ka sorkar kaba la pynmih ha ka 23/Kyllalyngkot/2023 kala kren shai ba ha ki surok bah jong ka sorkar pdeng, jong ka sorkar jylla bad kum juh haki surok kiba kham kongsan ha ki District khlem ioh jingbit na ka sorkar pdeng ym lah ban buh khyrdop khrong musur.
Katkum ki kyndon kiba la kdew la khang ia baroh ki khyrdop kiba don hapoh ka East Khasi Hills District hapoh ka kyndong jong ka 163 BNSS, lada don kiba ia leh pyrshah ia kane kin ngat ha ka jingpynshitom katkum ki kyndon ain.
