Shillong, Nailar 07: Ïa ka Indian Organ Donation Day kaba 15 la rakhe ha NEIGRIHMS ha ki rukom bapher bapher ban pynsaphriang ïa ka jingtip halor ka jingmyntoi jong ka jingai sngewbha ïa ki dkhot met hapdeng ki khynnah pule bad ki nongtrei jong kane ka Institute.
Ki jingrakhe ki kynthup ïa ka jingpyni bad jingïakren bniah halor ka Kidney transplant da u Dr. Cornerstone Wann bad ka kynhun ha ka Clinical Grand Rounds ha ka 2 tarik Nailar 2025. Palat 40 tylli ki poster la pyni ha ka jingïakob shna poster kaba la long ha ka 4 tarik Nailar halor ka phang pdeng ka jingai sngewbha ïa ki dkhot met.
Ban pynphriang shuh shuh ia ka jingsngewthuh halor ka jingai sngewbha ia ki dkhot met, la pynlong ia ka Mini Marathon hapoh ka jaka pule jong ka NEIGRIHMS ha ka 5 tarik u Nailar 2025. Palat 50 ngut ki nongiashim bynta kynthup ki nonghikai, ki khynnah pule, ki nongtrei lem bad ki khun jong ki ki la iashim bynta.
Ïa kane ka jingïalang pynkut la pynlong ha ka 5 tarik Nailar 2025 ryngkat ka jingsam ïa ki khusnam da u Director, U Prof (Dr.) Nalin Mehta. Ha ka jingkren pynkut jong u, u la ai khublei ïa ki nongïashim bynta bad pyntip ba ka NEIGRIHMS ka la don ka ka lynti ban sdang ia ka cornea bad kidney transplant na ka bynta ka jingmyntoi jong ki nongpang kane ka thaiñ.
Kumba shu pyntip ruh ka NEIGRIHMS ka dei kaba la ithuh kum ka State Organ and Tissue Transplant Organisation (SOTTO) na ka bynta ka jylla Meghalaya ha kaba u Dr. R Hajong, Professor ka Tnad Surgery, u long kum u Nodal Officer.
