Shillong, Naiwieng 09: Mynta ka sngi la buh ia u Mawnongrim ban tei ka “Resource Recovery Centre” kaba nyngkong kaba dei na ka Khasi Hills Autonomous District Council, hapoh ka skhim Solid Waste Management Cell.
Haba kren haba ia dei bad kane ka skhim u bah Pyniaid la ong ba tang ka Hima Mylliem ka don haduh 1464 tylli ki dorbar shnong bad haba shim ia baroh ki shnong hapoh ki 54 tylli ki hima kiba hap hapoh ka jingpeit jong ka KHADC ki don palat ia ka 3000 tylli, kane ka jaka bret niut kan long kaba nyngkong.
Kaei kaba ki paidbah ki kren mynta ha man la ki por ki don ar tylli, ka jingkhuid, ka um bad kine ki don ka jingiadei badka koit ka khiah, la ong ba tang ka jingkhuid na iing kan long namar hap ban bret ia u niut bad haba la long u niut ka um kan sa jaboh bad kane ka jingjaboh kan ktah ia ka koit ka khiah jogn u khun bynriew.
La ong ba kala dan ka jingiakren ha pdeng ka KHADC bad ka sorkar ba wanrah ia ka jingkhuid jingsuba don kam ia ka jingia treilang bad ki dorbar shnong namar ki dorbar shnong ki dei ki thymei ha ki shnong ki thaw, kumta ban don kam ia ka jingiatreilang na baroh ki liang.
Ban pynioh ia ka jingkhuid ka KHADC kan sa phah ia ki ophisar ban leit ban shah hikai kyrpang ha kaba ia dei bad ka jingialeh ban wanrah ia ka jingkhuid, la ong ba kane ka RRC mynta ka sngi ha Mawroh kan long ka nongmuna ia kiwei ki shnong kiba ka KHADC kan sa dang tei.
Ka KHADC kan long tang ka nongpynsdang bad ban ai jinghikai, haba ka shnong kala lah ban pyniaid ka kam baroh ka shnong kan sa pyniaid bad kaba kongsan ka long ba kine ki RRC kin long ki lat ai kam ia ki briew jong ka shnong da ka jingiatreilang.
Ha kane ka jingialang la pynbna ruhba ka KHADC kan sa sdang ia ka jaka ai jinghikai ia ki khun samla ban pyntbit ha ki jingtrei kaba ki trei, la ong ba bun ki samla kila biang ka jingpule hynrei ha ka kam pat kim nang ban trei, ka jaka kaba ka KHADC kan buh ban hikai ka long ban pynthikna ba ki samla ki long ki nongaikam ym ba kin long ki nongwat kam.
Ia ka RRC la batai bniah da u nongbai buid jong ka KHADC u bah Wanshan Kharkrang bad u dei ruh u Engineer jong ka Meghalaya State Pollution Control Board ba dei peit ia ka khuid ka suba, ha kane ka sngi la don lang u MDC ka Mawlai u bah Teiborlang Pathaw EM, u bah Victor Rani EM, bah Peter Lamare Rangbah shnong bad ki nongkit kam shnong.
