Shillong, Nailur 16: U Symbut Myntri rangbah ka jylla u bah Prestone Tynsong haba jubab ia ka mat ia kren ha ka “Zero Hours” kaba la wanrah da u bah Himalaya Shangpliang ha kaba ia dei bad ka surok kaba 74 km na Mawphlang sha Balat, la ong ba lada ka sorkar kam lah ban shna ban iaid ar tylli ki kali ruh ka sorkar kan pynheh ia kane ka surok.
U Symbut myntri rangbah ka jylla u la ong ba ka sorkar ka tip ia ka jinglong kane ka surok bad ka iaid ruh lyngba ka jaka ba jur slap tam ha sla pyrthei bad kane ka wanrah ia ka jingkylla ha ka jinglong ka khyndew ruh bad ka jingtwa ka surok ka dei ha ka kila meter kaba 60 km.
Ka sorkar ka ioh ia ka jingdon kam kane ka surok, namar kane ka surok ka pyniasoh bad ka South West Khasi Hills District bad sha South Garo Hills District, na ka liang jong u symbut myntri rangbah ba dei peit ia ka tnad shna surok u la ong ba lada ym lah ban shna ban iaid ar tylli ki kali “Double Lane” ruh ka sorkar kan pynheh ia kane ka surok da ka “Intermediate”.
Haba wan rah ia kane ka mat ia kren u bah Himalaya u la ong ba kane ka surok ka hap ha ki ar tylli ki PWD Division, na ka kilometer kaba nyngkong haduh 21 ka hap hapoh jong ka Mawphlang PWD sub Division kaba peit da ka Shillong South Division, katba na ka kilometer kaba 21 haduh 74 km ka hap ha ka jingpeit jong ka Mawsynram PWD Division.
Ia kane ka surok la shan naduh ki snem 1950 jong ka sorkar Assam bad kane ka surok ka long kaba don kam namar ka poi sha duh khappud bad ka Bangladesh, ka dei ka surok kaba la satar namar la shan ia ka la slem bha bad la don kam ban pynbha ia kane ka surok.
