Shillong, Naitung 01: U President ka sengkmie jong ka Hill Farmers Unin (HFU) ha ka sngi saitjain u la leit sha ka thain Phlangwanbroi, Mawsynram Block ha kaba la pynlong ia ka jingialang ryngkat bad ki paidbah nongrep jong ka shnong Phlangwanbroi bad kumjuh ruh bad ki nongrep jong ki shnong ba marjan.
Ha kane ka sngi la ioh ia ka jingpynshai halor ki nongrim bad ki mat treikam jong ka HFU lyngba u President u bah Commander Shangpliang. U la ong ba ka HFU ka ieng halor ka nongrim ban iakhun ia kiba bun ki jingeh jong ki nongrep, la ka long halor ka jingbym ioh symbai.
Ka jingbym ioh sboh, ka jingbym biang ka um, ka jingshah khniot dor, ka jingshah ot kilo, ban wanrah noh ia ka ain halor ka rep ka riang, ka jingbym biang ka iew ban ban pyniaid ia ki mar rep, ka jinghiardor jong ki mar rep, ka ri jingri, ki mrad bad ki dohum, bad baroh ki jingeh kiba ki nongrep ki iakynduh ha ka jylla.
U la iathuh ruh halor ki jingdawa jong ka seng kynthup halor ka Famer Commission ba la pyntreikam da ka sorkar, ban ithuh noh ia u latyrpad, sohmrit khlaw bad u synsar kum ki mar rep kiba la pyntreikam da ka sorkar, ban pynbna ia u snem 2019 kum u snem jong ki nongrep ha kaba ka sorkar ka la kular ban pyntreikam noh ia u snem 2020 namar ba la kham dier por mynta u snem.
Ban thaw noh da ka ain ban khang pyrshah bad mana ia ki nongkhaii kiba ju mylien ban ot kilo be-ain ia ki mar rep, ban buh dor ia ki mar rep lane Minimum support price ban lait na ka jingshah khniot dor, ban plié ia ki iew khappud bad ka Bangladesh, ban wanrah noh ia ka Agriculture Policy, ban wanrah ia ki processing unit bad kiwei kiwei.
U la iathuh ba ka seng hadien ba ka la lah ban pynlong ia ka Farmers parliament ka la skhem ka nongrim ban trei na ka bynta ki nongrep bad mynta u snem u la iathuh ba ka seng kan pynlong i aka famers parliament sha Garo Hill ban iohsngew ia ki jingeh jong ki nongrep jong ka thain Garo Hill.
U bah Command u la ong ba ka pork a la dei ba ki nongrep kin ieng hi noh dalade ban kren halor ki jingeh kiba kum ki nongrep jong ka thain Phlangwanbroi bad Mawsynram hi baroh kawei ki iakynduh. Hadien kane ki nongre ki la shim i aka rai ban thaw noh ia ki unit jong ka HFU ha man la ki shnong khnang ba kin lah ban leit rah ia ki jingeh jong ki nongrep hakhmat ka sorkar.
U bah Commander Shangpliang u la kyntu ruh ia ki nongrep ba kin thaw noh ia ki unit ha man la ki shnong ha kylleng ka Ri Khasi bad Jaintia khnang ba ma ki ryngkat bad ka sengkmie kin leit rah ia ki jingeh jong ki nongrep. ha kane ka sngi la iadon lang ruh u bah Diver Lyngkhoi, bah Gilbert Shangpliang dkhot jong ka HFU bad kumjuh ruh u bah O Pdahkasiej uba dei na ka thain Phlangwanbroi bad kumjuh ruh u dkhot jong ka central body.
