Shillong, Nailur 01: Mynta ka sngi ka seng HYC bad ki rangbah shnong ka thain Mawhati kila leit ban ia kynduh ia u myntri ba dei peit ia ki kam pynroi nongkyndong u bah Sniawbhalang Dhar ban kyntu ia ka sorkar ba ka dei ban buh noh ia ka C&RD Block ha katei ka thain Mawhati.
Ha dien ka jingiakynduh ia u myntri ka sorkar jylla haba kren ha ki lat pathai khubor u bah Kitdor Shadap u General Secretary jong ka HYC Mawhati Circle u la iathuh ba kajingwan jong ki ban ia kynduh ia u myntri ba dei peit ia ka tnad C&RD block ban dawa na ka sorkar ban buh noh la ka jong ka C&RD block namar haduh mynta ka ne ka thain ka la don ym palat ia ki 153 tylli ki shnong .
U bah Kitdor u la iathuh ba ka jingsah dien jong ki shnong ha ki thain Mawhati ka long namar ba ka jngai eh ka C&RD block bad ka C&RD block ka ba dei ban peit lang ia ka Mawhati ka don ha Umsning bad ha Bhoirymbong Ribhoi District ha ka ba ka wanrah ia ka jingeh na ka jingjngai ka lynti ka ba ktah ia ka por bad ia ka pisa.
U bah Kitdor u la ong ruh ba ka jingjngai jong ka C&RD ka pynduh nong ia ka thain Mawhati namar ba ka khang lad ban wanrah ia ki kam pynroi ha kitei ki thain,bad ka jingbuh ia ka jingdawa ban wanrah ia ka C&RD block ha ki thain Mawhati ka long ban pynskhem ia ka jong long trai jong ki tarijak ha ka tei ka thain namar ba ka don ha khappud bad ka Assam.
