Shillong, Jymmang 12: Na ki lai tylli ki District Council kiba don ja ka jylla Meghalaya ka KHADC, GHA
DC bad ka JHADC kaba dang lah ban pynbiang ia ki nongtrei dei tang ka KHADC haduh mynta. Katba ki nongtrei jong ka GHADC la jan ar snem ki khlem ioh thikna ia ka tulop bad ki nongtrei ka JHADC mynta la hynniew bnai.
U Bah Titosstarwell Chyne Chief Executive Member Jong ka Khasi Hills Autonomous District Council haba kren ha u SP News Agency u la ong ba ia mynta, ia kata kam pat don ka jingpyrkhat ban bat ia ka tulop jong ki nongtrei, kaei kaba ki ia pyrkhat, ka long beit ba ka jinglum ia ka khajna na ka Profession Tax bad kiwei ki jinglum khajna kaba ki juh don ki dei ban iaid beit.
Kawei pat ki lad jingioh jong ka KHADC ki long ba ki don ki bhah kiba dei ban ioh na ka sorkar, la iathuh ba na ka liang jong ka sorkar myne kane wat ha ka por bala don kane ka COVID-19 ruh ka sorkar kala pynlait ia ka bhah bad u pynpaw ia ka jingsngewnguh ia u myntri rangbah ka jylla wat la ka dang bun ka bas ah.
Na ka liang jong u CEM jong ka KHADC u kyrmen ba kane ka jinglong jingman kan iaid beit noh, khnang ba lada na ka sorkar ka pynlait noh tang ia ka bhah kaba ki dei ban ioh ruh yn pyrhang katba lah ban pynbiang, te lada kynduh jingeh pat ia kata kin sa ia pyrkhat kin sa ia rai pat ha ka executive committee.
Haba ia dei bad ka jingpynthymmai ia ki Trading License na ka liang jong ka tnad ba peit ia ka khaii pateng ki la sdang mynta ka sngi ki la sdang ban pyniaid ia kane ka kam ban pynthymmai ia ki laisen, thrai ba ki nongkhaii ki hap ban wan noh ban pynthymmai ia ki Trading License.
Haba ia dei bad ki nongtrei, ki ophisar kila wan trei 100% bad ki wei ki dang wan hi 33% bad ka jingwan jong ki ka long katkum ka pali kaba la buh ia ki. Na ka liang ka ophis kala pyrshang ban bud ia ka jingpynia jngai iwei na iwei ha ki jaka trei.
Ka ophis kan sa pyrshang na khyrdop ban sanitise ia kiba rung, ha khmat ophis la buh ia ki jaka thet kti, ha ki kamrai la buh ia ki hand sanitizer bad mynta ka sngi la sam ia ki sanitizer sha ki MDC bad yn sa sam ruh sha baroh ki nongtrei.
