Shillong, Lber 9: Mynta ka sngi 9 Lber 2026 ki kynhun seng bhalang ki bapher bapher jong ka ri lum Garo kila ia lum paidbah ha khmat ka ophis jong Deputy Commissioner ka West Garo Hills District ban pynpaw iaka jingpyrshah iaka jingiohlad ki bym dei ki riewlum ban iashim bynta ha ka MDC Elekshon sha ka iing dorbar ka Garo Hills Autonomous District Council.
Ki seng bhalang bapher bapher mynta ka sngi kila ialum paidbah hajan DC Ophis kaba dei ka sngi sdang ban thep kyrteng ban iakhun ia ka MDC Elekshon mynta u snem 2026 ka ban long ha ka 10 tarik Iaiong bnai ban wan, kane ka jingpyrshah kin iai bteng haduh bakut ka sngi thep kyrteng ka ban long ha ka 16 mynta u bnai.
Mynta ka sngi u kyrtong shimet u S.G.Esmatur Mominin uba la mut ban leit thep kyrteng ban iakhun ia ka MDC Elekshon na ka MDC Konstitwensi Balachanda um shim la ioh lad ban thep kyrteng, ban lait na kano kano ka jingjia ba sngewsih ki pulit kila synran noh ia u na katei ka jaka da ki kali pulit.
U Tengsak G Momin u president ka Garo Student Union ula ong ba kum ka seng kala thoh sha ka sorkar naduh u snem 2007, la phah biang iaka jingpynkynmaw ha u snem 2011 kumjuh ha u snem 2021 ba ka sorkar ka dei ban shim ia ki lad ki lynti ba kiban iakhun ia ka MDC kin long tang ki rilum ka jylla bad mynta u snem 2026 kila hap ban shim ia kane ka jingiamih paidbah ban pyrshah namar ba ka sorkar kam shim la sngap ia kaei kaba kila dawa.
