Shillong, Rymphang 12: Mynta ka sngi ki kynhun Seng Nongbylla bapher bapher kiba don ha ka Ri India baroh kawei mynta ka sngi kila pynlong ia ka Nationwide General Strike ban pynpaw ia la jingpyrshah Ia ka sorkar pdeng kaba ki shim ba ka long pyrshah ia ki nongbylla bad ka ai jingkyrshan ia ki kompeni kiba heh.
Kane ka jingiakhih ka jong ki ka long pyrshah ia ki Labour Code kaba ka sorkar pdeng kala pyntrei kam mynta ka jingpyrshah ka jong ki ka long ba ka por trei kam ha ki jaka trei bapher bapher ka long phra kynta ha ka shi sngi hynrei mynta ki kwah ban pyntrei khatar kynta ha ka shi sngi.
U bah Edward Lynshing u General Secretary Meghalaya Joint Council Trade Unions Associations haba kren ha ka jingialang kaba la long mynta ka sngi ha khmat ka dur mot Kiang Nangbah ba ka jingleh ka sorkar pdeng ban ailad ia ki kompeni bar ri ba kin seng kam ha kane ka ri ha kaba kin bei pisa hi dalade kane kan long ka jingaibor ba kin khniot ia ki nongbylla.
Ka Kynhun jong ki Nongbylla ki pyrshah ia ka jingiateh ka ri America bad ka ri India ha kaba iadei bad ka jingthied ia ki symbai rep bapher bapher namar kane kan ktah ia ki nongrep bad kane ka jingiateh kular kan pynduh nong ia ka Ri India namar ba haba thied ia ki symbai hap siew 18% sha ka America katba haba ka America ka thied na India kam don kano kano ka jingsiew la kynnoh.
Kumta ki kynhun trei bylla bapher bapher ki dawa ba ka sorkar pdeng ka dei ban pynduh noh ia ki saw tylli ki Labour Code ki dawa ruh ba dei ban pynneh ia ka Scheme MGNREGA kaba la pynduh da kane ka sorkar BJP nalor kiwei kiwei ki mat jingdawa.
