Shillong, Lber 29: Ka Election Kommittee ba la jied da ka CEC jong ka Khasi Students’ Union (KSU), ban pyniaid ia ka ilekshon kaba XVI sha ka ophis trei kam jong ka KSU na ka bynta ka samoi trei kam 2026-2029, ka pynbna iar lyngba kane ka kyrwoh ba ka ilekshon kan long ha ka 9 tarik u Jymmang, 2026 naduh ka por 8 baje mynstep haduh 3 baje janmied ha Dinam Hall, Jaiaw, Shillong.
Ha kaba iadei bad kane ka phang, kane ka Committee ka khot ka wer ia baroh ki khun samla kiba la ih jong ka bri u hynniewtrep, khamtam na ka liang ki dkhot jong ki unit bapher bapher ka KSU ba kin mih shakhmat ban iakit iabah lem ia ka lyngkor ba khia jong ka KSU naka bynta ka ri bad ka jaitbynriew, da kaba iashimbynta shitrhem kum ki kyrtong ha katei ka ilekshon. Ia ki jingtip ba bniah halor kane ka kam lah ban ioh na ka ophis trei kam ka KSU ha Jaiaw Chapel, Shillong.
Iaki kot ban thep kyrteng ban ia khun ia ka elekshon yn sdang ban ai naduh ka 04 tarik u Iaiong haduh ka 11 tarik u Iaiong, 2026 naduh ka por 11 baje mynstep haduh 5 baje janmied na ka Ophis trei kam ka KSU.
Naka bynta ban pynpoi ia ki kot thep kyrteng kan long naduh ka 06 tarik u Iaiong haduh ka13 tarik u Iaiong, 2026 haduh ka por 5 baje janmied.Ka jingweng noh ia ka jingthep kyrteng la buh tang ha ka 14 tarik u Iaiong 2026.
Ka jingbishar ia ki kot thep kyrteng kan long ha ka 15 tarik u Iaiong, 2026 ha ka por 1 baje nohphaisngi. Ia ki kot thep kyrteng dei ban pynpoi ha lane shwa jong katei ka tarik ba la kdew haneng ha u Shongknor lane ha u Sekretary ka elekshon kommittee.
Ka elekshon kommittee ka bthah ia baroh ki shnat bad ki shna ha ki district ban pynpoi ia ki kyrteng jong ki nongjied kaba long 10 ngut na kawei kawei ka shnat bad ki kynhun bad district hapoh ka 11 tarik u Iaiong, 2026 ha ophis trei kam jong ka Seng ha Jaiaw.
Ka kommittee ka sngewbha ruh ban pyntip ba ka la jied ia ki katto katne ki nongialam ba rim, ki riew rangbah, ki nonghikai bad kumjuh ruh na ka liang ki lad pathai khubor ban long kum ki nongpeit pyrman ia ka jingiaid beit iaid ryntih jong kane ka ilekshon, kane ka long katkum ka kyrwoh kaba la phah lang u shongknor bah Danny M Khyriem bad u bah Samuel B Jyrwa Secretary ka elekshon kommitte ka KSU.
