Shillong, Rymphang 03: U Lat ka jylla Meghalaya u C.H. Vijayashankar, mynta ka sngi u la iakren bad ka kynhun ki nongthoh khubor na Karnataka ha ka jingiakynduh kaba la long ha Lok Bhavan, Shillong.
Kane ka kynhun ka don ha ka Press Tour sha Meghalaya ba la pynlong da ka Press Information Bureau (PIB), Sorkar India, kaba thmu ban ai ïa ki riew shemphang ha ki lad pathai khubor ban ïohi markhmat ïa ka kolshor, ka pateng bad ki sienjam ba iadei bad ki kam pynroi jong ka Jylla.
Namar ba u C.H. Vijayashankar udei na Mysuru, Karnataka, ka jingïakren ka la long kaba kyrpang. U Lat u la ïakren bad ka kynhun ha ka ktien Kannada, kaba la wanrah ïa ka jinglong kaba sngewtynnad bad ka plie lad ïa ka jingïakren kaba laitluid bad kaba don jingmut bad ki nongthoh khubor kiba wan shane.
Ha ka jingiakren, u Lat u la batai lyngkot ia ka kynhun shaphang ka jinglong kyrpang jong ka imlang sahlang bad ka kolshor jong ka jylla Meghalaya, da kaba ban jur ia ka rukom ai jait sha ka kmie kaba kyrpang jong ka, ki riti dustur tynrai kiba riewspah, bad ka jingialong kawei kaba iadei jong ki jaitbynriew bapher bapher.
U la ban jur kumno kine ki jinglong tynrai ki dang ïai bteng ban pynwandur ïa ka imlang sahlang bad ka kolshor jong ka Jylla.
U Vijayashankar u la batai bniah ruh halor ka jingkhlain bad ka lad jong ka Meghalaya ha kaba iadei bad ka rep ka riang, ka kam jngohkai pyrthei, bad ki kam ba iadei bad kane, da kaba ban jur kyrpang ha ka roi ka par kaba iaineh bad ka kam jngohkai pyrthei ka bym ktah ia ka mariang.
U la ban jur ia ka jingdonkam ban kyntiew ia ki mar ba don ha ka thain katba dang pynthikna ia ka jingpynneh pynsah ia ka mariang bad ka roi ka par kaba kynthup lang ia baroh.
U Lat u la pynkup burom ia ka kynhun ki nongthoh khubor da ka Ryndia, ka jain tynrai ba la thain da ka kti jong ka jylla Meghalaya. U la batai ia ka jingdonkam jong ka silk Ahimsa, na kaba la shna ia ka Ryndia, da kaba ong ba ia ka silk la pynmih khlem da pyniap ia u khniang ryndia, kaba pyni ia ki rukom treikam kiba don jingbahkhlieh, ka jingpynneh pynsah, bad ka jingpyrkhat ia ka mariang kaba la rung jylliew ha ki riti dustur jong ka thain.
U Lat u la kren ruh shaphang u shynrai Lakadong, uwei na ki mar rep jong ka Meghalaya uba la pawnam ha ka pyrthei, uba la tip bha namar ka jingdon bun ka curcumin. U la kren shaphang ki sienjam ban kyntiew ïa u shynrai Lakadong kum u mar rep organic ba bha bad ka bynta jong u ha kaba kyntiew ïa ka kamai kajih jong ki nongrep bad pynkhlain ïa ka ïoh ka kot ha ki jaka nongkyndong.
Ka kynhun ki nongthoh khubor ka la pynpaw ka jingsngewnguh ïa ka jingpdiang sngewbha bad ka jingïakren kaba ai jingtip bha, da kaba ong ba ka Press Tour sha Meghalaya ka la ai ïa ki ka jingsngewthuh kaba kordor shaphang ka kolshor, ki riti dustur, bad ki sienjam na ka bynta ki kam pynroi jong ka Jylla.
La khmih lynti ba ka jingiakren kan iarap ban wanrah ia ka jingsngewthuh kaba kham iar ha ka ri shaphang ka jylla Meghalaya lyngba ka kam jong ki nongthoh khubor kiba don jingtip bad kiba don ka jingkitkhlieh.
