Shillong, Lber 23: Da kaba ban biang halor ka jingkongsan ka jingkylla ha ka rukom im ban ioh ia ka jingkhuid kaba neh bad ka jingbha ha ka koit ka khiah, ka Central Bureau of Communication (CBC), Shillong, ka la pynlong ia ka Special Publicity Programme shaphang ka Jingkhuid bad ka Jingioh ia ka Bam kaba Tei ia ka Met ha Laitkor Presbyterian Secondary School, East Khasi Hills, ha ka 20 tarik u Lber, 2026.
Kane ka prokram ka thmu ban ai jingtip ia ki khynnah skul shaphang ka jingkongsan jong ka jingkhuid bad ka jingioh ia ka bam kaba tei ia ka met, bad ka pynshlur ruh ia ki ban pdiang ia ki rukom im kiba don ka jingbahkhlieh.
Ha ka jingai jingkren ha kane ka sngi, u Bah Womber Shadap na ka Tnad Urban Affairs, Shillong u la batai shaphang ki jingthmu jong ka Swachh Bharat Mission. U la ong ba kane ka mission kam dei tang shaphang ka jingpynbiang ia ki jingdon jingem hynrei ka peit bniah ia ka jingkylla ha ka rukom im jong ki briew.
Da kaba ban jur halor ki bynta kum ka jinglum ia ki jait niut bapher bapher ha ki iing, ka jingkiar na ka jingbret niut pathar, bad ka ‘Ka niut jong nga, ka jingbahkhlieh jong nga’, u la pynshlur ia ki khynnah ba kin shimti ia ka jingkhuid ha ka iing jong ki bad ha ki jaka ba ki don.
U la iamir jingmut bad ki khynnah shaphang ki rukom im jong ki ha kaba iadei bad ka kam bret niut bad ka jingkhuid. Ki khynnah ki la iashim bynta shitrhem bad ki la batai shaphang ki jingshem bad ki jingmut jong ki kumno ban pynthikna ia ka jingkhuid. U la kyntu ia ki ba kin long ki nongmihkhmat na ka bynta ka jingkylla ha ka longiing bad ka shnong jong ki.
Ka Kong O Sumer, District Health & Education Officer, East Khasi Hills District, ka la batai shaphang ka jingioh ia ka bam kaba tei ia ka met. Ka la ban jur halor ka jingioh ia ki jait bam bapher bapher, ki rukom bam kiba tei ia ka met, bad ka jingpynthikna ban bam ia ki jait jingbam kiba suk ban ioh hynrei kiba tei bha ia ka met khnang ba ki khynnah kin ioh ka jingsan kaba pura. Ka la kren ruh shaphang ka prokram Weekly Iron and Folic Acid Supplementation (WIFS) kaba iada na ka jingduna snam ha ki khynnah samla bad ka jingkyntiew ia ka koit ka khiah jong ki.
Ha kane ka prokram la iashim bynta da ka Headmistress jong ka skul, Kong Rupaia Pala, kaba la ai ka jingsngewnguh na ka bynta kane ka prokram bad ka la pynshlur ia ki khynnah ba kin leh khuid bad bam ia ki jingbam kiba tei ia ka met.
Kum shi bynta ka prokram, ka la don ka jingiakhun quiz bad jingdro shaphang ka jingkhuid bad ka jingioh ia ka bam kaba tei ia ka met hapdeng ki khynnah. Ki khynnah ki la iashim bynta ha kine ki jingiakhun da ka jingshongshit, ha kaba ki la pyni ia ka jingsngewthuh jong ki shaphang ka jingkhuid bad ka rukom im kaba koit ba khiah. La sam ia ki khusnam sha ki nongjop kaba la wanrah ia ka jingthrang ban ioh jingnang jingstad bad ban don ka jingiashim bynta.
Ha kane ka prokram la iashim bynta lang da ki khynnah skul, ki nonghikai bad ki nongpyniaid ia ka skul, bad ka la kylla long ka rynsan kaba seisoh bha na ka bynta ka jingai jingtip, ka jingiamir jingmut bad ka jingiakut jingmut na ka bynta ka jingtei ia ka imlang sahlang kaba kham khuid.
