New Delhi, Nohprah 05: Ka Sorkar India bad ka Asian Development Bank (ADB) mynta ka sngi ki la iasoi ia ka jingshim ram kaba $50 million kaba thmu ban kyntiew ka jingdon um da kaba shna ia ki rukom pynlang um ban kyntiew ia ka jingioh um bad pynduna ka jingktah ka jingkylla ka suinbneng ia ka imlang sahlang ha Meghalaya.
Kiba soi ia ka soskular na ka bynta ka jingshim ia kane ka ram ha Meghalaya kilong ka Juhi Mukherjee, Joint Secretary, Tnad Economic Affairs, Tnad Kam Pla Tyngka jong ka sorkarpdeng, na ka liang ka Sorkar India, bad ka Mio Oka, Country Director jong ka India Resident Mission jong ka ADB, na ka liang ka ADB.
Hadien ka jingsoi ia ka soskular shim ram, ka Mukherjee ka la ong ba ka projek ka iahap bad ka Meghalaya State Water Policy (MSWP) 2019, kaba thmu ban kot sha ka roi ka par kaba lah ban ianeh, ka jingpeit bad ka jingpyndonkam ia ka um ha ka jylla lyngba ka rukom treikam kaba iashim bynta lang, ka jingpynduna ia ka jingktah bad ban kyntiew ia ka jingpeit ia ki jingdon jingem kiba iadei bad ka um.
“Nalor ka jingbei tyngka, ka jingai jingmyntoi shuh shuh ka ADB ka kynthup ka jingiarap ia ka jylla ban pyntreikam ia ka MSWP bad ialam lynti ha ki sienjam ban pyniasoh ia ki kam kiba iadei bad ka jingkylla ka suinbneng ban wanrah ia ki jingpynkhreh na ka bynta ka jingshngain ha kaba iadei bad ka um.
Kane ka kynthup ka jingsainduria ki rukom pynlang um ban kyrshan ia ki kam rep, ki kam ri dohkha, ka jingpynpoi um, bad kiwei kiwei ki lad kamaikajih na ka bynta ka jingkyntiew ia ka ioh ka kot,” la ong ka Oka.
Ka projek kan iarap ban wanrah ia ka WHS master plan na ka bynta ka jylla da kaba peit ia ki tyllong um bad ka jingiada na ka jinglynshop ki bor ka mariang. Kane kan ialam lynti sha ka jingpynkhreh ban wanrah jingshngain ha kaba iadei bad ka um ha ki shnong ki thaw ban khmih da ki village employment council, ki watershed management committee bad ki water users’ association.
Ka projek kan kyrshan ka jingshna 532 tylli ki jaka pynlang um barit ha 12 tylli ki district. Kine ki jaka treikam kin pyndonkam ia ki sienjam ba lah ban iaineh na ki jyingkylla ka mariang ban pynlang bad pyniaid ia ka por jur slap bad ki jingshlei um ha ka aiom slap.
Ka um kaba la pynlangkan iarap ha ka jingdon um ha ka aiomtyrkhong. Ka projek kan kyntiew 3,000 hectare ka jaka ban pynbiang um ia ki jaka rep na ka bynta ki nongrep.
Yn plie 50 tylli ki jaka peit bniah ia ka jinglong ka suinbneng bad ban lum jingtip shaphang ka suinbneng bad peit ia kane ka kam bad ruh ki lad ai um ia ki jaka rep ba rit ha ki thain Garo, Jaintia bad Khasi Hills. Ka projek kan pyrshang ia ka micro-hydropower na ki lad pynmih bording ba lah ban pynthymmai ha lai tylli ki WHS.
Ka ADB kan iarap ban pynkhlain ka bor treikam jong ka Meghalaya State Watershed and Wasteland Development Agency bad ka Tnad Soil and Water Conservation ha ka jingpyniaid ia ki kam kiba iadei bad ka um, ka jingpyntreikam bad ka jingpeit ia kine.
Shuh shuh, ka projek kan ai jinghikai ia ki nongrep, khamtam ki longkmie, ban kyntiew ia ki lad kamaikajih ba seisoh ha ka kam rep ba bun bynta kum ka horticulture bad ki rukom ri dohkha.
Ka ADB ka ieng skhem ban pynurlongia ka Asia bad Pacific kaba seisoh, kaba kynthup ia baroh, kaba khlain bad kaba iaineh, da kaba kyrshan ia ki sienjam jong ka ban rat dyngkhong ia ka jingduktasam. La seng ha u snem 1966, kadei kaba la pyniaid da 69 ngut ki dkhot- 49 na ka thain.
