Shillong, Iaiong 1: Mynta ka sngi 1/Iaiong/2026 ka sorkar Meghalaya kala iasoi iaka soskular iasngewthuh jingmut bad ka Starlink India lyngba ka video conference ha kaba u myntri rangbah ka jylla u Conrad K Sangma ula ia sakhi lang ia kane ka jingiateh kular bad kane ka dei kawei na ki lad ban kyntiew iaka kamai kajih ha ka jylla ban kot sha ka 10 billion ha ka pisa iapein ka US dollar shwa u snem 2028 namar ka jingpyndonkam ia ka internet ka dei kawei na ki lad ban kiew ha ka ioh ka kot.
Haba iasoi ia kane ka soskular u myntri ka tnad pule puthi u Bah Lahkmen Rymbui ula ia donlang kumjuh u Additional Chief Secretary ka sorkar jylla u Sampath Kumar lem bad kiwei kiwei ki heh sorkar katba na ka liang jong ka Starlink la don u Jwynne Shotwell u President bad u COO, Space X u Lauren Dreyer, ha ka jingiadonlang u Vice President uba dei ka Starlink uba peit iaka kam khaii pateng u Prabhakar Jayakumar uba peit ia ka kam ha India na ka bynta ka Starlink bad ladonlang u Parnil Urdhwareshe uba dei u direktor ha India.
U myntri rangbah ula ong ba ha kine ki phra snem jong ka sorkar kila pynleit jingmut kumno ban wan rah ia ka jingtei ki jinghikai bad ban pyndonkam iaki kor ki bor katkum kane ka juk kaba mynta ba ki poi kham shajan ha u paidbah, ula ong ka jingeh kaba ia kynduh ka long ba kumno ban pynpoi iaka jingpyndonkam iaka internet shaduh ki kyndong kynshrot bad kumba ka long mynta la pynpur iaki optical fiber ban poi sha ki jaka sumar sha ki nongkyndong ki skul ki shnong ki thaw bad ban leh ia kane ka shim por shibun.
U myntri rangbah u ngeit skhem ba da kaba ailad ia ka Starlink kan wan rah shibun ki jingkylla ban ioh iaka jingsumar ba kham biang kan iarap ba ki khynnah kin ioh ka jinghikai kaba baing kan iarap ban kyntiew ia ka ioh ka kot bad kane kan pynmyntoi shaduh ki nongrep haduh ki nongkyndong.
Ha kajuh ka por u myntri rangbah ka jylla ula ong ba ka sorkar ka da angnud shisha ban pynkhlain iaka Information Technology ha ka jylla namar ka sorkar kwah ban pynlong iaka sor Shillong kum ka pdeng jong ka Information Technology na ka bynta ka thain shatei lam mihngi ka Ri India baroh kawei ka don ruh ia ka jingthmu ban buh iaka jaka sah internet da kaba pyrshang ban pyniasoh bad ka Submarine Cable bad kane ka long ha ka jingkiew ba iadei bad ka jingstad hawhaw, u myntri rangbah ula ong ba u iohi ba don kane ka lad, kane ka jingiatreilang kan kyntiew ha kiba bun ki bynta.
