Shillong, Nailar 06: Ka Khasi Students’ Union (KSU), Umiam Circle, hapoh ka jingïalam jong u President Bashem Kharnaior, ryngkat bad u Asst. Organising Secretary Banshan Nongbsap, Education Secretary Battilang Nongbri, lem bad kiwei ki nongïalam jong ka seng, ha ka por 6 ba je mynstep ki lah ioh jingtip ia ka jingdon jong ki Mynder kiba wan lyngba ka kali AS 25 CC 4375, bad la suba ba la ialam ia kine ki mynder da u briew uba kam ialade kum u pulit.
Katkum katei ka jingtip, la ïathuh ba utei u briew u la pyni ïa ka Police Identity Card kaba don kyrteng Brill Rongpeit, kaba la kam ba la pynmih da ka ophis jong u Commandant, 1st Battalion, Meghalaya Police, Mawiong, Shillong.
Ha ka por jong ka jingïakren bad ka jingbishar, ka KSU ka la lap ba utei u briew u la lum pisa haduh ₹1,000 na man la uwei na ki san ngut ki bar jylla kiba la shong ha ka kali kaba don ïa ka number AS 25 CC 4375, bad la ong ba katei ka pisa ka dei kum ka bai rung sha ka jylla.
Hynrei ha ka por ba ka seng ka dawa ban pyni ïa ki kot ki sla kiba pynshisha ïa katei ka jinglum pisa, u briew uba kam ialade kum u pulit lem bad kitei ki san ngut ki bar jylla ki la phet krad noh na ka jaka, khlem ai jingpynshai eiei.
Ka jingphet noh kynsan jong utei u briew bad kitei ki bar jylla ka la nang pynjur shuh shuh ïa ka jingsuba sniew jong ka sengi a kitei ki briew bad ruh ia utei u briew u ba kam ialade kum u pulit. Ka KSU Umiam Circle ka la pyntip noh mar mar sha ka KSU Mawlai Circle ban ïatreilang ha ka jingbuddien bad ban lap ïa kito kiba donkti, namar kane ka
jingjia ka pyni ba ka don ka jingkheiñ sting ha ka rukom peit ïa ka jingrung jingmih bad ka lah ruh ban don ka jingïatreilang kaba be-aiñ kaba ai lad ïa ka jingrung be-aiñ jong ki bar jylla.
Ka KSU ka pynpaw ba kane ka jingjia ka long kaba sngewsih bad kaba pynbitar shikatdei eh, khamtam ha kane ka por ba ka jingrung kyrthep jong ki briew nabar jylla sha ka jylla Meghalaya ka la nang kiew stet.
Ka jingdon u briew uba kam ialade kum u pulit bad uba lum pisa na ki bar jylla ban ai lad ïa ka jingrung jong ki ha ka jylla, ka dei ka kam kaba die tad dor ïa ka hok bad khein troin ia ki trai jylla bad ka jingpyndonkam bakla ia ka uniform pulit.
Ki bor pulit ki dei ban peitngor bad tehlakam ïa ka jingrung bad jingmih be-aiñ, hynrei kane ka jingjia ka pyni ba ka don ka jingtreilang kaba sniew lane ka jingpyndonkam bakla ïa ka bor.
Ka jingphet krad noh jong kitei ki briew ha ka por ba kylli jingkylli ruh ka pyni ba ka don ka jingthmu ban pyniap ïa ka jingshisha bad ban khanglad ïa ka jinglap. Ka KSU ka dawa mardor na ka Meghalaya Police Department ban pynshai ïa ka jingshisha jong u briew uba la tip kyrteng kum Brill Rongpeit.
Ka Police Department ka dei ruh ban pynshai, la u dei shisha u pulit uba don ha ka kam bad u ba la pyndonkam bakla ïa ka kyrdan ne ka kam jong u, ne la u dei tang u briew uba kam ïalade kum U pulit ban pyniaid ïa ki kam be-aiñ.
Kane ka jingjia ka pynkhih shisha ïa ka jingshaniah jong ki paidbah ia ka tnat pulit, khamtam haba ym shym lada kam don kano kano ka jingshai lane ka jingkit khlieh kaba biang na ka liang ki bor synshar.
Lada ka long kaba suk ba ki briew kin pyndonkam ïa ka ID pulit khlem hok, kane ka pynpaw ba ka don ka jingsynjor ha ka jingpeitngor na ka liang kiba don ka aiñ.
Ka jingsngewkhia ka mih ruh hadien ka jingpyndam noh ia ka jingling nongshon shnong bad ka jingkhynra jong ka sorkar Assam ia ki Bangladeshi ha katei ka jylla, kaba pynlong ia ka seng ban sngewsyier ba kine ki Bangladeshi kin wan buhai shnong sha Meghalaya, kaba lah ban wanrah ia ka jingkiew jong ka jingwan rung beain (influx) sha ka jylla.
Ka KSU ka pynpaw ba ka dang ïeng skhem ban ïada ïa ka jinglong trai, ka jingim bad ka hok jong ka Jaitbynriew. Ka seng kan dang bteng ban ïakhun pyrshah ïa kino kino ki rukom rung be-aiñ, ne ki kam kiba pynsniew ïa ka imlang sahlang bad ka jingkhanglad jong k ajingrung kyrthep ki mynder.
Ka seng ka kyntu ruh ïa ka sorkar bad ka tnat pulit ba kin leh da ka jingtohkit kaba bniah bad ban pyntreikam ïa ki lynti treikam ba biang khnang ba kane ka jait jingjia kan ym mih biang ha ki sngi ban wan.
