Shillong, Lber 15: Ki shipai BSF kiba don ha khappud kila ioh ban kem 7 ngut ki khar Bangladesh bad 2 ngut ki nong India na khappud jong ka East Jaintia Hills bad East Khasi Hills District bad na South Garo Hills District.
Ki shipai BSF kila ioh ban kem saw ngut ki khar Bangladesh na East Jaintia Hills bad 2 ngut ki nong India ha East Khasi Hills bad lai ngut ki khar Bangladesh na South Garo Hills District.
Ka jingioh kem ia kine ki khar Bangladesh ka long ha dein ba kila ioh ia ka jingtip lyngba ki tnad syntiat ba ki khar Bangladesh kila rung sha India na khappud ban wan wat kam sha India, kane ka jingioh kam ka long bala khang ia ka jingrung beain ha khappud.
Ki ar ngut ki nong India kiba la shah kem ka long ba ki kit shini ha ki kali jong ki ban leit phah sha Bangladesh ha Nayabazar ha thain Pynursla, ia kitei ki ar ngut la ioh ban kem katba ki dang phah ia Shini sha Bangladesh.
Ia kiba la ioh ban kem la aiti sha ki briew jong ka ain ba kin leh ia kaba don kam katkum ki kyndon ain, ki BSF kiba don ha khappud ki long kiba peitngor ban pynthikna bha kan nym don kano kano ka kam beain ha khappud bad ka Bangladesh.
