Shillong, Naitung 28: Wan kiew ki khar Bangladesh shaduh shajan Dangar , East Khasi Hills District lyngba ki lieng . Katkum ka khubor ba la saphriang ka long ba kine ki khar Bangladeshi ki la wan kiew da ka jingthmu ban wan kit maw.
Kaba lyngngoh pat ka long ba kumno ki Border Security Force kiba don ha Dangar Border Outpost (BOP) ki pyllait lan bad kim lah ban leheiei halor kane.
Ka KSU South West Khasi Hills District bad ka KSU Balat Border Area Circle ka pynpaw iaka jingsngewkhia halor kane ka jinglong jingman bad ka jingiohlad ki khar Bangladeshi ban kiew laitluid shaduh u pud u sam jongka ri India.
Kane ka pyni ba imat ka lah ban don ka jingiasngewthuh jingmut hapdeng ki shipai iada khappud ( BSF) bad ki khar Bangladeshi. Kane kan buh jingma bha iaka Jaitbynriew jongngi.
Lada ka paw kumne khlempep kane kan pynsuk ruh iaki bym dei ki nong India ban shim ia kine ki ktem shipai kum ki jaka rung tuh ha kaba na kine ki jaka kin kiew bad leit buhai shnong sha kiwei kiwei ki jaka jongka bri u Hynniewtrep.
Ka seng ka dawa namar kata iaki bor District jongka East Khasi Hills District bad kumjuh ruh jongka South West Khasi Hills District ba ki dei ban tuklar mardor halor kane lem kumta naka liang ka seng ngim banse ban hap hiar hi sha kito ki thain bad ban shim iaka sienjam da lade hi lada kiba kum kine ki dang iai jia ha ki por ban sa wan.
