Shillong, Lber 29: Ka seng Meghalaya Swimming Association kala pynpaw ia ka jingsngew kmen ba ka samla Verem Gedaliah Nongsiej na Meghalaya kala ioh ia ka takma rynong ha ka jingiakop jngi kaba 50 meter na ka bynta ki kynthei kaba la long ha Chhattisgarh.
Ia kane ka jingiakop jngi la tip kum ka 1st Edition of Khelo India Tribal Games kaba la long ha ka 27/Lber/ 2026, ka samla Verem Gedaliah Nongsiej ka dei kaba nyngkong na ka jylla ban ioh takma ha ka jingiakop jong ha ka ri.
Ka samla Verem Gedaliah Nongsiej kala mih khmat ia ka jylla Meghalaya bad 7 ngut kiwei de kiba ka Meghalaya Swimming Association kala hikai hapoh ka jingpeit jong u nonghikai u Laitonjam Santosh.
Na ka liang jong ka seng ka Meghalaya Swimming Association ka pynpaw ia ka jingsngew kmen ba kala wanrah burom ia ka jylla bad ka seng ka ai ka jingkhublie bad ka jingkit bok kaba kyrpang ia ka ba kan dang kiew ha kane ka jingialehkai la ong bah Baika R Lyngdoh Secretary Meghalaya Swimming Association.
