New Delhi, Naitung 11: Ka Sorkar Pdeng bad ki Sorkar Jylla ki la shim lypa katto katne ki sienjam ban tehlakam bad iada na ka khlam COVID-19. Ha ryngkat ka jingpyniaid ryntih ia ki containment zone, ka jingpeit bniah, ka jingithuh bad jingsumar mardor ia ki case COVID-19, ki briew kiba la ioh jingkoit na kane ka jingpang mynta ka sngi ka la palat 5 lak.
Na ki 5,15,385 ngut ki nongpang COVID-19 haduh mynta ki la ioh ia ka jingkoit bad la pyllait noh ia ki na ki jaka ai jingsumar. Ki briew kiba ioh jingkoit na kane ka jingpang ki kham bun ia kito kiba dang don hapdeng ka jingpang kiba don mynta 2,31,978 ngut.
Lyngba kane, ka recovery rate mynta ka la kiew shuh shuh sha ka 62.78%. Ha kine ki 24 kynta ba dang shu dep, 19,870 ngut ki nongpang COVID-19 ki la ioh ia ka jingkoit bad la pyllait noh ia ki na ki jaka ai jingsumar.
Mynta ki don 2,83,407 tylli ki case ba dang iaid bad baroh kine ki don hapoh ka jingsumar ha ki hospital ba pyniaid da ka Sorkar Pdeng bad ki Sorkar Jylla ia kito kiba jur ka jingpang, katba kito ki bym pat pyni dak jingpang bad kito kiba don malu mala ki dak jingpang ki ioh jingsumar ha iing.
Ki jingpynkylla kiba dang shen ha kaba iadei bad ki polisi kiba ailad ia ki doktor ba kin phah test na ka bynta ka COVID bad ka jingwanrah ia ki Rapid Antigen Point of Care Testing ha ryngkat ka RT-PCR ka la pynkhlain shuh shuh ia ki rukom test na ka bynta ka COVID-19 ha ka ri.
Haduh mynta, la dep test 1,13,07,002 ki sample lyngba ki lab jong ka Sorkar bad ki kynhun shimet hapoh ka diagnostic network jong k ICMR kaba don haduh 1180 tylli ki lab ha kylleng ka ri. Katba ki lab jong ka Sorkar ki la kiew sha ka 841 tylli, kito kiba pyniaid da ki kynhun shimet mynta ki don 339 tylli. Ka jinglah ban test ha ka shi sngi ka la kiew ha kaba hynnin, la lah ban test haduh 2,82,511 tyli ki sample.
Haduh mynt, ka Test per Million (TPM) ha ka ri ka long 8193.Ki lab ba leh Real-Time RT PCR testing: 620 (Sorkar: 386 + Shimet: 234).Ki lab ba leh TrueNat testing: 463 (Sorkar: 420 + Shimet: 43).Ki lab ba leh CBNAAT testing: 97 (Sorkar: 35 + Shimet: 62)
Na ka bynta ki jingtip kiba biang halor ka COVID-19 kiba iadei bad ka teknoloji, ki jingbthah bad ki jingai jingmut, sngewbha peit man ka por ia ka: https://www.mohfw.gov.in/ bad @MoHFW_INDIA.
Ia ki jingkylli halor ka teknoloji ba iadei bad ka COVID-19 lah ban phah sha ka technicalquery.covid19@gov.in bad ia kiwei kiwei pat ki jingkylli lah ban phah sha ka ncov2019@gov.in bad @CovidIndiaSeva .Lada don ki jingkylli halor ka COVID-19, sngewbha phone ha ka helpline jong ka Tnat Health & Family Welfare ha u no.: +91-11-23978046 lane 1075 (khlem donkam siew). Lah ban ioh ruh ia ki number helpline jong ki Jylla bad ki UT halor ka COVID-19.
