Shillong, Risaw 24: Ha ka jingkyntiew ban ioh kam ioh jam ia ki samla ha kane ka thain, ka IndiGo, ka kompeni liengsuin kaba heh tam ha India, ka la pynlong ia ka jingjied ne interview na ka bynta ka kam Cabin Crew ha ka jaka ai jinghikai jong ka Don Bosco Youth Centre, Laitumkhrah, Shillong. Ia kane ka jingjied ban ai kam la pyniaid da ka Emporium Skills Training Institute (ESTI).
Ki don baroh 56 ngut ki samla kynthei na kylleng ka thain shatei lammihngi ki ba la iashim bynta ha kane ka Interview. Hadien ka jingbishar bniah, la lah ban jied tang san ngut ki kyrtong: ka Deilana Shallam, ka Mahi Sah, ka Cassandra War, ka Silveris Mary Lyndem, bad ka Ritika.
Kane ka dei ka sien kaba ar ba ka jaka ai jinghikai jong ka Don Bosco ka la pynlong ïa ka interview ban thung kam ïa ki nongtrei ha ka Cabin Crew ha ka jingïatreilang bad ka ESTI, kaba pyni ïa ka jingshakri ba bha jong katei ka centre ban pynlongbriew manbriew ia ki samla ka jylla ryngkat bad ka jingtreilang jong ka ESTI.
Ka Don Bosco Youth Centre, Shillong, ka la nang kiew stet kum ka jaka ba kongsan na ka bynta ban pynkupbor ia ki samla bad ban kyntiew ia ki sap ha kane ka thain.
Lyngba ki prokram ai jinghikai bapher bapher bad ki jingiatreilang bad kiwei pat ki company bad ki industry, ka Centre ka la pynsuk ia ki samla kiba bun ban ioh kam la ha India bad shabar ri. Ka jingiatreilang jong ka bad ka ESTI ka pynskhem shuh shuh ia ka thong jong ka ban plie lad plie lynti ia ki samla ban ioh ka kam ka jam.
Dei ryngkat bad kane ka jingthmu, ka ESTI kan dang bteng ban ai jinghikai ba kyrpang ha ka Centre, ban pyntibit ïa ki kyrtong da ki sap kiba ïadei bad ka kam ha palat 20 tylli ki ri ha ka pyrthei.
