New Delhi, Iaiong 22: Ka 24 tarik u Iaiong ka dei ka sngi kaba kyrpang ha ka histori jong ka jingsynshar ialade ha India namar ha kane ka sngi ha u snem 1993, u President ka ri India u la ai jingmynjur ia ka 73rd Constitutional amendment kaba ai jingithuh ha ka Riti Synshar ia ki kynhun Panchayati Raj lane ki Panchayati Raj Institution (PRI) ha ka ri.
La wanrah ia ka Part IX ha ka Riti Synshar hadien kane ka jingpynkylla kaba la wanrah ia ki lai bynta jong ki Panchayat, ki bor bad ki jingbahkhlieh jong ki Panchayat. Ka 73rd constitutional amendment ka pyndep ia u snem ba laiphew mynta ka sngi.
Ki Panchayati Raj Institution (PRI) ki dei ki rishot jong ka synshar paidbah. Ban pynkhlain ia ki PRI, ka Sorkar India hapoh ka jingialam jong u Myntri Rangbah Duh, u Narendra Modi ka la shim shibun ki sienjam bad ka la trei kham bha ha ka Amrit Kaal. Kawei na kine ki sienjam ba heh ka dei ka jingpyntreikam ia ka PESA Act.
Lyngba kane ka ain, ngi la wanrah ia ka rukom treikam kaba khlain ha kaba ki Panchayat kiba trei ha ki jaka bapher bapher jong ka ri ki dei kiba la ioh jingithuh katkum ki kyndon. Lyngba ka jingbteng ki sienjam jong ka Sorkar, bun na ki Jylla ki la pyntreikam ia ka ain PESA bad ngi dang pynshlur ia ki jylla ba dang sah ba kin pyntreikam ia kane.
Hapoh ka jingialam jong u Myntri Rangbah Duh, ngi la iohi ia ka jingkiew jong ka jingmang ka pisa na ka bynta ki kynhun Panchayati Raj ban ai jingkyrshan ia ka jingdonkam ia ki jingdon jingem bad ki kam ka roi ka par ha ki jaka nongkyndong.
Ka sorkar kala shim shibun ki sienjam ban pynkhlain bad pynkupbor ia ki kynhun Panchayati Raj, ka jingkyntiew ia ka jinglah don ki nongmihkhmat jong ki PRI ban pyndep ia ki kamram bad ki jingbahkhlieh bad kyntiew ia ka jinglah treikam, ka jingshai ha ki kam bad ka jingbahkhlieh jong ki PRI ban don ka bynta ha ka roi ka par, ka jingkiew ka ioh ka kot bad ka jingpynurlong ia ki Sustainable Development Goal (SDG).
Ka jingthmu jong u Myntri Rangbah Duh ka dei ba ngi dei ban pynlong ba ki Panchayat ki long kiba lah ban kyrshan ialade bad ka jingpynkupbor ia ki. Ka dei ka jingpyrshang jong ngi ba ki PRI, da kaba peit hi ia ki jingdonkam, ki wanrah ia la ki lad pynmih pisa ha ryngkat ka jingmang ki skhim sorkar lyngba ka jingiashim bynta ki paidbah bad ban pyntreikam ia ki skhim katkum ki jingdonkam jong ki Panchayat na kane ka pisa bad ba ki bteng ban iaid shaphrang sha ka roi ka par.
Ka Gram Sabha ka long ka bynta kaba kongsan ha ka jingsynshar ialade bad ka long kaba donkam bha na ka bynta ka jingshai ha ki kam bad ka jingtrei ki Gram Panchayat da ka jingbahkhlieh bad ka Sorkar jong ngi ka dang pynshlur ia ka jingpynlong ia ki Gram Sabha da kaba pdiang lang ia baroh kiba don bynta ha ki kam.
Ka la dei ka jingpyrshang jong ka Sorkar Pdeng ba hadien ka 73rd Constitutional amendment, ki PRI ki dei ban long kiba la shah pynkupbor bad kiba treikam. Ki don katto katne ki Jylla kiba la trei kham bha ha kaba iadei bad kane.
Ka bor pyniaid Jammu and Kashmir, khamtam u Lieutenant Governor jong ka Union Territory Jammu and Kashmir, u Manoj Sinha u dei uba hap ban ioh jingiaroh namar ki sienjam ha kine ki kam. Kumjuh, kiwei kiwei ki Jylla /Union Territory ki dei ban shim ia ki sienjam ba khlain ban pynkupbor ia ki PRI.
Ka Sorkar Pdeng ka la pynthymmai ia ka jingpeit bniah ia ka jingtei ia ka jinglah synshar bad ka jingai jinghikai ia ki nongmihkhmat bad ki nongtrei ha ki PRI ba kin trei na ka bynta ki SDG bad ka jingpyniahap ia ki Gram Panchayat Development Plan (GPDP) bad ki SDG ha ki jaka jong ki.
Ka long kaba kyrpang ba shuwa u 2022-23, jan baroh ki Gram Panchayat bad kiwei kiwei ki kynhun kiba iaryngkat kyrdan ki la lah ban pynkhreh ia la ki GPDP.
Ban wanrah ia ka jingiaid ryntih, ka jingshai bad ka jingbahkhlieh ha ki kam synshar ha ki shnong, ka tnat Panchayati Raj ka la pynthikna ia ka jingpynkylla digital ia ki kam panchayat da kaba wanrah ia ki jingai jingshakri kum ka e-GramSwraj application na ka bynta baroh ki kam lyngba ki lad digital naduh ka jingpynkhreh kam haduh ka jingai jingsiew.
Sa kawei ka sienjam ka dei ka jingthied ia ki mar bad ka jingai jingsiew ia ki jingshakri da ki Panchayat ha ka GeM ia kaba yn plie paidbah da u Myntri Rangbah Duh mynta ka sngi ha Rewa, Madhya Pradesh. La saindur ia ka AuditOnline Application na ka bynta ka jingpeit online ia ki jingkhein jingdiah jong ki Panchayat.
Kumta ki sienjam e-governance da ka jingngeit ha ka ‘Jingpynduna ka jingsynshar, Jingpynbun ka jingshakri’ ka la poi sha ki bor pyniaid shnong kaba dei ka kam kaba khraw ba la leh da kane ka Sorkar jong ngi haba u Myntri Rangbah Duh u la pyllait paidbah ia ka e-GramSwaraj application ha u Iaiong 2020.
Ka PM SVAMITVA, ka mih na ki jingthmu jong u Myntri Rangbah Duh kaba ai ia ki ‘Record of Rights’ ia ki trai iing ha ki jaka nongkyndong lyngba ka jingai ia ki property card. Ka record of right ka la wanrah ia ka jingkylla kaba khraw ha ka jingpynkylla pisa ia ki jingdon jingem ha ki jaka nongkyndong bad ka la plie lad ia ki Panchayat ba kin sngewthuh bad lum khajna ha ka jingpyrshang jong ki ban kyntiew ia ki lad pynmih pisa lajong.
Ka tnat Panchayati Raj ka la iaid shaphrang ha ka thong jong ka ban pynkupbor bad ka jingkyrshan ki PRI ialade da kaba pyniasoh ia ki jingthmu jong kiwei kiwei ki tnat Sorkar Pdeng bad ka jingiatreilang ki paidbah hapoh ka jingialam jong ki nongmihkhmat ha ki jylla bad ka jingpynkhlain ia ki jingpyrshang ha kane ka bynta ha ka por jong ka Azadi Ka Amrit Kaal.
Ha kane ka sngi kyrpang na ka bynta ki Panchayati Raj, nga ai khublei ia baroh ki nongmihkhmat bad ki nongtrei ha ki PRI bad kitbok kitrwiang ia ki ba kin kot sha ki kliar ba thymmai ha ka jingkyntiew ia ki panchayat.
