Shillong, Rymphang 28: U Symbut myntri rangbah ka jylla u bah Prestone Tynsong haba jubab ia ka jingkylli ba la wanrah da u bah Brightstarwell Marbaniang la ong ba ka National Highway-6 naduh Jorabad haduh Mih Myntdu kaba iaid lyngba ka Shillong bypass ka surok ka bha lait noh ha ki bynta na Sonapur sha Ratacherra kaba ka jingtrei ban pynbha ka dang iaid sha khmat bad ka NH-6 kam shym iaid lyngba ka Mawlai.
Haba jubab ia ka jingkylli bynrap ka NH-106 na lad Umroi sha Shillong ka sorkar ka la ai sha ka NHIDCL bad halor kane ka la don ka jingiakren ba kumno ban wad ki lad ki lynti ban pynheh ia ka surok na lad Umroi ri Bhoi District ban poi sha Shillong,u myntri u la ong ba ki ia kynduh shibun ki jingeh ha ki katto katne ki bynta ban pynheh ia kane ka surok.
Ha ka jingiakren la ia pyrkhat ban shna ia ka surok ka ban tynrong ha suin kum ka jingkieng kaba ki khot Elevated Road hadien ba la jurip bniah da ka NHIDCL kam iahap bad ia kane ka jingpyrkhat la hap ban pynsangeh noh, kawei pat ka long ban shna ia ka surok Four Lane da kaba pyniaid na sharud bynta ka mawlai, Mawprem ban poi sha Umshyrpi bad kawei pat ka jingpyrkhat ka long ban pynheh ia kane ka surok kaba mynta da 12 metre ryngkat ki lynti iaid kjat.
Haba ia dei pat bad ka jingrit ka surok iaid kali ha ISBT u myntri u la kubur ba ka dei ka jingshisha ba ha kane ka bynta ka don ka jingeh ban pynheh ia ka surok namar ka don kawei ka jaka jong ki riew shimet kaba ka sorkar ka dang ia kren mynta lada ki treh ban kohnguh ia kaei kaba ka sorkar ka kwah lada ioh ia kane ka jaka ka thie ka jaka ban rung sha ISBT kan nym don jingwit shuh.
