Shillong, Rymphang 17: Ka Hynñiewtrep Youths’ Council (HYC) ka pynrem jur bad kyntait ïa ka jingkren dang shen jong u Ma Vincent H. Pala, President ka MPCC, da kaba kam ba “u pud u sam Indo-Bangla u la biang pura bad ka jingtieng ïa ka jingwan tuid ki briew ka long tang ha ka jingmutdur.” Kum kane ka jingkren kam dei tang ba ka long kaba kren laplah khlem Nongrim bad kaba ialam bakla iaki jingshisha.
Ban kam ba u pud u sam Indo-Bangla u long uba la skhem pura ka long ka jingpynjah burom bad ka jingpynlehrain ïa ki jingïakynduh jingeh ki trai ri trai muluk jong ka Meghalaya kiba la sakhi ka jingrung kyrthep be-aiñ kaba ïai bteng ha ki jaka ba khappud jong ka Indo-Bangladesh border; ka jingleh thok ia ki kot ki sla kum ki Aadhaar thok, ki ID nongthep vote bad kiwei kiwei.
Ka jingwan rung tuh sha ki jaka khlaw ki bri ki bsah khappud bad ki jaka paidbah da ki briew kiba la suba ba ki dei ki nongshong shnong beain ne poiwir bad ka jingkiew ka jingeh ha ka jingbun briew ha ka Jylla.
Lada u pud u sam u la long shisha uba “la skhem pura,” balei ba ki jingkem, ia ki nongwan rung beain ki ju jia nakapor shakapor? Balei ki nongshong shnong haki khappud ki sngewkhia bad ki sengbhalang bapher bapher ki iai pynsngew iaka jingshongsyier bad jingsheptieng halor ka jinglaitlan u pud u sam ka Jylla? Balei ki tnad pahara hi ki pdiang ba kadon ka jinglaitlan bad ka jingdon ki lynti iaid jong ki katto katne ki bynta jong ka Border?
Ka HYC ka ngeit ba ki jingkren kum kine ki pynshlur ym tang ia ki kynhun kiba pynrung tuh beain bad ruh kabuh ia ki jingeh jong ka jingshongshngain jong ki trai ri trai muluk. Ban jingtheh umpjah ia ki jingsheptieng bad jingsyier jong ki trai ri trai muluk dakaba ong ba kadei tang ka “jingmutdur” kam dei ei ei hynrei ka jingai-ding ia ki trai ri kiba ialeh ba pynim ka khyndew ka shyiap long trai, ka jinglong kyrpang bad ka hok sain pyrthei jong ki.
Ka histori ka la hikai ia ngi ba ka jingshah thombor ha ka liang ka jingbun briew kam ju jia tang shi miet; ka jia suki suki, kadei ka thma kaba jar-jar, ba ka jaitbynriew kan shah tyllep ha u mynder shisngi bad hangta kan sa dier ka por.
Ka HYC ka la buh ia kine ki jingkylli ha khmat u Ma Pala halor kum kane ka jingkren. Mano ba ioh jingmyntoi na kaba pynbna ba la pynskhem pura ia u pud u sam haba ki paradoh para snam kiba shong ha khappud bad ki jingshisha ki ong lym kumta? Mano ba ioh jingmyntoi na kaba khein sting ia ka jingshongsyier jong ki trai ri trai muluk? Hato kane ka dei ka jingpyrshang jong u ban saitkhuid ha ka kam sain pyrthei ia ka mat kaba khia jong ka jingshongshngain ka ri bad ka jingim jong ki trai ri trai muluk?
Ban khot ia ki jingshongsyier bad jingtieng ki trai ri trai muluk kaba “shu mutdur laplah” ka long ban iehnoh ia ka histori, ka jaka bad ka jingshisha. Ka HYC kan dang iai pynsngew bad kyang iala ka sur kan dang iai iakhun iai ialeh haduh ba ki pud ki sam kin long kiba la skhem pura —ym ha ki jingkren halor suin bad jingkren sain pyrthei, hynrei ruh ha ka jingiakhun hakaba shai kaba shit.
Ka jingim jong ki trai ri trai muluk jong ka jylla Meghalaya kam dei ka jingmut jingpyrkhat. Ka long ka jingshisha kaba dawa ban leh eiei bad lehse u ma Vincent Pala u dei ruh ban pdiang ia ka jingshisha ba um dei u Nongaiktien jong ka Sorkar Meghalaya ne India, kaba lah ban pynlong ia ki trai ri trai muluk ba kin pyrkhat da kum wei ia u shimet bad ia ka parti jong u.
