Shillong,Rymphang 17: U myntri Rangbah ka jylla u Conrad K.Sangma haba jubad ia ka jingkylli ba la wanrah da u bah Heavingstone Kharpran la iathuh ba ki don 36 ki nongiarap kum ki riew shimet bad 59 ki nongiarap kum ka kynhun.
U Myntri Rangbah u la kren shai ba kine kim dei ki nongtrei sorkar, ki trei ia ka kam ba la bynshet ha ki kat kum ki skhim, na ki 36 ngut ki riew shimet kiba dei ki nongiarap 19 ngut ki dei kiba na ka jylla bad ka sorkar ka pynlut T.4.35 klur ha u snem mang tyngka 2024-2025.
Haba phai pat sha ki 59 tylli ki nongiarap kum ka kynhun ia ki ym shym la siew bnai hynrei la siew katkum ka kam kaba ki trei bad ka jingsiew ia ki ka long T.131 klur bad kane ka pisa ka dei kaba la don lypa bad ka skhim ia kaba ka sorkar kam donkam ban siew eiei.
Haba jubab ia ka jingkylli bynrap u Myntri Rangbah u la ong ba ka jylla Meghalaya napdeng ki jylla kiba rit ka la long kaba nyngkong eh ban ioh kat ki skhim nabar ri kaba la kot haduh T.12,000 klur tyngka bad na kane 5% la mang na ka bynta ban pyntrei ia ki skhim kaba mut kan kot sha ka T.600 klur.
Haba iadei bad ki skhim jong ka sorkar pdeng ruh kumjuh ka dei ka rukom ban don ia ki nongiarap bad ia ka pisa la mang lypa ha ka skhim, ka kamram jong ki nongiarap ka long ban pynshna ia ki skhim na ka bynta ka sorkar jylla bad ban phah ia ki sha ki kynhun bei pisa nabar ri bad kumjuh sha ki tnat sorkar ka sorkar pdeng.
