Shillong, Naiwieng 26: U Symbut Myntri Rangbah ka jylla u bah Prestone Tynsong ula ong ba ka jingdih ia ka dud ka iarap ban kyntiew ha ka koit ka khiah ia kane u la kren ha ka jingrakhe ia ka “National Milk Day 2020” kaba la pynlong ha ka Yojana Bhavan Shillong.
U bah Prestone u la ong ba ka jingrakhe ia ka National Milk Day ka dei ka jingai burom ia u Dr. Verghese Kurien u ba la tip ‘Father of the White Revolution’ bad dei lyngba jong u ba la lah ban wanrah ia ka jingkylla ha ka kam pynmih Dud ha ki nongkyndong ha ka Ri India.
Haba ia dei bad kane ka sorkar kala shim shibun ki lat ki lynti kumno ban ialeh ban pynkiew ia ka jingpynmih ia ka dud ha ka jylla namar ka jingdih ia ka dud kham tam ia ki khynnah ka iarap ban kyntiew ia ka koit ka khiah ban tei ia ka met ka phad.
Ka dud ka dei ka bynta kaba kongsan ban tei ia ka met ka phad jong u briew, na ka liang jong ka sorkar ka ialeh ban kyntiew ia ka kam pynmih Dud ha kane ka jylla namar kane ka long ruh ka lat kamai ban kyntiew ia ka ioh ka kot jong ki paidbah da ka ba pynshlur lyngba ki kynthun ia treilang u la ai ka jingiaroh ruh ia ki kynhun ia treilang kiba la leh la ka bynta ban ha kane ka kam.
Ka sorkar kala pynkhreh ia ka lynti kumno ban kyntiew ia kane ka kam ha ka jylla da kaba wanrah ia ki lat ki lynti kumno ban pynkhlaim shuh shuh ia ka jingpynmih Dud ha ka jylla bad u la kyntu ia ki seng ia treilang ba kin shim ia ka ram kaba khlem sut ban kyntiew ia ka kam pynmih Dud ha ka jylla.
Ha kane ka sngi la ai khusnam ruh sha kito ki nongrep kiba la kiew ha ka kam pynmih Dud, la pynlait paidbah ruh ia ka kot ha kaba ia dei bad ka jingpynmih Dud bad la ai burom ruh ha kane ka sngi ia u nongiakura ba paw jong ka jylla u Hameshaniah Suiam bala ioh ia ka takma ksiar ha kane ka jingiakop kura. Ha kane ka sngi la don lang ruh ki ophisar jong ka tnad ri jingri jong ka sorkar jylla.
