New Delhi, Nohprah 21: U Myntri Rangbah duh jong ka Ri India u Narendra Modi mynta ka sngi u la leit sha ri Kuwait halor ka jingkhot jong u khlieh nongsynshar katei ka ri u Sheikh Meshal Al-Ahmad Al-Jaber Al-Sabah.
U myntri rangbah duh ka Ri India u la ong ba, u niew kor bha ia ka jingiadei ha pdeng kine ki ar tylli ki ri kabala neh bun pateng, ka jingiadei kam dei eh tang ha ka khaii pateng, hynrei ban don ka shong suk, ka jingiada ri, ka jingshong skhem bad ka jingkiew ha ka ioh ka kot ha ri sepngi jong ka dewbah Asia.
U Myntri rangbah duh ka Ri India u khmih lynti ba ha ka jingiakynduh ka jong u bad u khlieh nongsynshar katei ka ri bad u myntri rangbah duh katei ka ri, kan long ka kabu ksiar ban iakren kumno ban wan rah ka jingiadei kabas kham jan shuh shuh ha ki por ban dang wan ban myntoi lang ba baroh ar liang.
Ka jingdon ki nongshong shnong ka Ri India ha Kuwait kala wan rah shisha ia ka jingiajan ha pdeng kine ki ar tylli ki ri. U myntri rangbah duh ka Ri India u la pynpaw ia ka jingsngewnguh halor ka jingshah khot kyrpangsha katei ka ri ban ia don bynta lang ha ka jingplie ia ka Arabian Gulf Cup kaba dei ka jingialehkai kaba paw bha ha katei ka thian.
U Myntri Rangbah duh jong ka Ri India u la ong ba kane ka jingleit jong u sha katei ka Ri kan dang wan rah shuh shuh ia ka jingiajan kaba kham kyrpang bad kine ki ar tylli ki ri nang ne sha khmat.
