Shillong, Sept 13: U Myntri ka Sorkar Jylla u ba khmih ia ka tnad sam bam u Bah Comingone Ymbon mynta ka sngi ka 13 tarik u Nailur 2024 ula kynthoh pyrshah ia ka jingiakhih ba la khot pynlong da ka Voice of the People Party (VPP) halor ka jingkiew dor jong ki marbam mardih ha ka jylla, da kaba ong ba kadei tang ka buit ban myntoi ha ka kam sain pyrthei.
Ha ka jingiakren bad ki nongthoh khubor u Bah Comingone Ymbon ula batai ba ka jylla ka shaniah tylli ha ka jingwanrah ia ki marbam mardih kiba kongsan nabar, namar ka jylla kam dei ka jylla kaba pynmih bun ia ki jhur ne ka doh Kane ka jingshaniah ka pynkiew ia ka dor ka mur.
U la pynshai ruh ba ka jingkiew dor ka dei namar ka jingeh ha ka jingpynpoi iaki marbam, ki jingduna ha ki jingtei bad ki jingjia ba shabar u pud ba lah ban leh eiei kum ka jingkylla ka suinbneng, hynrei kam don satia, kano kano ka jingpyniaid bakla jong ka sorkar jylla.
U la ong ruh ba kawei ka dawbah kaba ktah ia ka dor ka dei namar ka jingdon jong ka jingkhang kaba dang shen ia ki kali heh kiba kit palat ia ka 4 metric ton ban iaid lyngba ka jingkieng Umiam.
Ki trok kiba kit ïa ki jhur bad kiwei kiwei ki mar kiba kongsan na Assam mynta ki hap ban ïaid da ka lynti kaba kham jngai lyngba ka Mawryngkneng, kaba pynkiew ïa ka bai kit na ka T.100 sha ka T.200 ban pynpoi ia ki marbam sha Shillong bad kane ka jingeh kala pynlong ban don ka jingkiew dor ha ka jylla.
U la ong ruh ba ngi ha Meghalaya ngi shaniah tylli ha ki jylla kum ka Maharashtra bad Bihar na ka bynta u piat bad kiwei kiwei pat ki mrbam. U la ongruh ba ka jingbym don ki lynti rel bad ka jingshaniah tylli ha ka leit ka wan da ki kali, kala pynkiew ia ka jinglut jingsep ha ka kit ka bah bad kane ruh ka lam sha ka jingkiew dor.
U Myntri Sorkar ula kdew ruh ba ka jingbym don lynti rel ha kiba bun ki bynta ha Meghalaya kala nang pynsniew shuh shuh ïa ka jinglong jingman bad ula ai nuksa ba ka lynti rel ha Mendipathar ha rilum Garo ka lah ban pynhiar ia ka dor. U la ong ba ha Rilum Garo, ngi don ia ka lynti rel, u khaw u kham tad dor haduh T.13 haba ianujor bad ka nongbah Shillong.
Katba na ka liang jong u Commissioner & Secretary ka Tand Food and Civil Supplies, u Pravin Bakshi, ula batai ha kano ka rukom ka jylla kala pyntreikam ia ki sienjam ban khmih ia ka jingkiew ka dor ka mur ha ka jylla bad ban pynneh iaka jingryntih lang.
Hynrei ula pynshai pat ba ka jingiapher ka dor ha kiwei pat ki jaka kadei namar ba ki don ki dukan kiba dei ban shim rem katba don pat kiba shim duna bad kumta kala mih ka jingiapher.
U la iathuh ruh ba la buh ia ka ‘Dashboard’ ban khmih bniah ia ka dor jong ki marbam kiba kongsan ha kylleng ki jylla bapher bapher, ia kaba ym donkam ban phah briew ban leit peit ia ka dor jong ki marbam.
Ia katei ka Dashboard la la thaw da ka Ministry ban peitngor ia ki dor ki mur jong ki marbam kiba kongsan ha man la ki jylla. La pyndonkam ia katei ka rukom treikam ban ianujor ia ki dor ki jong ngibad ki jylla kibamarjan bad ban pynthikna ba kan long kaba khuid bad shai kdar.
