Shillong, Iaiong 08: Ka The Meghalaya Football Association mynta ka sngi ka pyntip ba ka jingialehkai sdang ka lympung the 5th Meghalaya State League (MSL 5), kan sdang da ka jingiakhun hadpeng ka Nongkseh SSCC pyrshah ia ka Khimusniang SC kaban long ha SSA Stadium First Ground, Polo, kaba la buh ban long ha ka 15 tarik mynta u bnai Ïaiong.
Kane ka jingiakhun kaba dei artad jong ka Group A kan sdang ha ka por 5 baje janmiet, ha kaba u myntri ba dei khmih ia ka tnat Sports & Youth Affairs u bah Wailadmiki Shylla un long kum u kongsan.
Kum ka kynhun, ka Nongkseh kadei kawei na ki klob kaba la sdang bha ba kan khring ia ki khmat u paidbah nongpeit kai, hadien ka jinglah ban paw bad ban ialehkai bha ha ka samoi ialehkai u snem 2025, kaba wan hadien ba ka la lah sha ban rah ia ka nam lahduh ha ka First Division, hadien kane ka la rah pat ia ka nam lahduh ka Champions Cup, ha kaba baroh artylli kine ki lympung kidei ba la pynlong ia ki da ka Shillong Sports Association.
Katba na ka liang ka Khimusniang, kane ka kynhun ka pyrshang ba kan lah ban ioh ia ka jingsdang ba paka, katno tam lei lei hadien ba ka la ioh ba kan rah ia ka nam lahduh U Kiang Nangbah Memorial Trophy ka West Jaintia District Sports Association’s Super Division ha ka samoi ialehkai u snem 2025.
Kane kan dei ka sien ba nyngkong ia kine ki artylIi ki kynhun ba kin iakhun pat sa ha kum kane kawei ka lympung bah ialehkai phutbol kaba heh ha ka jylla, ia kaba la pyniaid ia ka da ka MFA bad ia kane ka lympung la iarap ban kyrshan ia ka da ka Directorate of Sports and Youth Affairs.
Mynta ka kynti, ka MSL kan long kaba kham kyrpang namar jia ryngkhat ba la pynlong ia ka, ha ka khep ba kum ka synjuk ka MFA ka rakhe ruh ia ka Golden Jubilee.
Ha ka jingshisha, ka MSL-5, la thmu ban sdang ia ka ha kane ka sngi Saitjain ka taiew, hynrei ka Centralised Registration System (CRS) ka All India Football Federation’s (AIFF) ka la kham pynjlan noh ia ka por sdang .
Kaba kham sngewtynnad ban tip hangne ka long ba ha ki saw samoi ialehkai kiba la dep, ki kynhun ne klob ba rah ia ki nam lahduh ki long ba iapher, ha kaba la rah nyngkong ia ka Niaw Wasa United ha 2017-18, Shillong Lajong (2019), Rangdajied United (2023) bad Mawlai (2024-25).
