Shillong, Naitung 21: Ka jingkhang tala ia ka marten da ka seng Samla Mawlai Pyllun mynta ka sngi ka dei ka jingtlot ki kyndon jong ka KHADC la ong u bah John F Kharshiing ha ka kyrwoh mynta ka sngi.
U bah John u la ong ba la don kam kyrkieh ban ioh ban lum ia ka Dorbar Hima Mylliem lane ka jingpynbeit kaba thymmai ha kaban thung ia ka Dorbar Thaw Ain ka Hima Mylliem kaban kynthup 200 ngut ki Rangbah Shnong kiban long dkhot da ka pali.
Kine ki kynthup ia ki Nongsynshar na ki 16 Raid, bad 20 ngut ki riewkhmat na ka Shnong, Raid ne Hima ba ngin ioh ia kren ia kum kine ki jingeh kiba bun kynthup ia kane ka jingeh kaba ia kynduh ki Seng Samla Mawlai Pyllun.
La don kam ia ki bor KHADC ba kin shim khia ban long kiba shemphang ban saindur ban pynlong ia ka Dorbar Thawain bad ka Dorbar Hima Mylliem, U khun u hajar – People’s Parliament ban ioh ia kren halor ki jaka theh, jaka pynlang sboh, ban ia kren ia u synniang u bynhei.
Ban ia kren ia ki Ain shna iing, jaka ieng kali, ka jingpyntuid painkhana sha ki wah ki um ka sor, ka jingbuh ATM ha surok khlem jaka ieng kali, ki dukan ba bun khlem jaka ieng kali ha shilynter ki surok kaba wanrah ia ka jingdheng kali.
Ka jingdonkam ban pyndonkam ba ki bor KHADC kin mang pisa sha ka Hima Mylliem ban buh da ki kor ka jingstad mynta ban buh thup ia ki jaka puta ba bat ki raiot.
Ban buh jingkhein ia ki pata u khun u hajar, hapoh ka Hima Mylliem baroh kawei bad bun kiwei kiwei ki kam kiba ia dei bad ka jingkhien jingdiah, ka mang tyngka kaba man ka snem (ka annual budget) ka kaiphod na ka Executive Dorbar Syiem, ki iew ki hat, ban shai halor ka hok ki raiot kiba shong kiba don jingbat pata hapoh Hima Myllirm.
Ka jingdonkam ban kynthup lang ia ki Rangbah Shnong, ki Nongsynshar Raid bad ki riewkhmat kiban shah jied da ka Dorbar Hima sha ka Executive Dorbar, Hima Mylliem, ka synshar Khadar hapoh u pud u sam Hima Mylliem.
Ban wanrah ia ki kyndon pyniaid dorbar kiban long ki kyndon kiba shai ha ka ba lum bad pynlong ia ki Dorbar Kur, Dorbar Shnong, Dorbar Raid, Dorbar Thaw Ain, bad Dorbar Hima Mylliem.
Donkam kyrkieh ia ki bor KHADC ban pyndonkam ban pynshlur ia ki Shnong,, Raid bad Hima ba kin ia long dorbar shnong dorbar raid dorbar kur bad dorbar Hima da ki kor IT.
Ka juk stad mynta kaba ki khynnah samla skul baroh ki pydonkam da ka zoom, lane google meet ban pynieng pynkhlain pynim ia ka Dorbar Hima Mylliem ba kan long kaba im bad kaba treikam katkum ka Riti Dustur kaba kynthup naduh Shnong, Raid bad Hima kynthup lang ia baroh ki Khun ki Hajar ka Hima.
Lano ki bor KHADC kin kyndit bynriew kin jubap ia ki dorkhast kiba ngi la buh na ki khun ki hajar naduh 15 October 2019, 21 December 2020, bad 15 December 2020 halor ki jingeh kiba ki khun ki hajar ki ia kynduh ha kaba iadei bad ka synshar khadar hapoh Hima Mylliem, haduh kine ki sngi ngim ioh wat tang ka jubap. Ngi thoh ki shithi kiba bun sha Delhi bad bar Ri ngi ioh jubap, ngi thoh shithi hangne ha sor ngim ioh jubap.
Kaba kham Lyngoh shisha ka long ba haduh kine ki sngi ki khun ki hajar kim pat ioh sngew ka jingshai na ki 15 ngut ki MLA/MDC kiba rim bad kiba thymmai kiba iadei bad u pud u sam Hima Mylliem, halor ki kyndon ain ba la pynjari ki ar tylli ki kyndon Ain Ka Mylliem Syiemship Act 2007 bad ka Rule 2015 jong ka Hima Mylliem da ki bor KHADC.
Kaei kaba pynlong ia ki MLA bad MDC ba kim pat juh ia kynduh para MLA bad MDC ban ia kren kumno ban tei ban pynbha ban thaw ia ki Act ki Rule Hima Mylliem kiba im kiba treikam. La donkam kyrkieh lyngba ka Dorbar Thaw Ain Hima Mylliem bad lyngba ka Dorbar Hima Mylliem ban ia kren ban sain dur ia ki jaka theh nuit kylleng.
Ki 500 tam ki Dorbar Shnong bad ki 16 Raid hapoh ka Hima Mylliem. Kane la donkam ka jingiakren ha man ki 54 Hima, Elaka hapoh Ri Khasi bad hapoh ki 19 Elaka hapoh Jaintia Hills. Balei ki nongsynshaar KHADC kim lah ban treikam lyngba ki kor stad kiba pyndonkam da ki khynnah skul kum ka google meet bad zoom.
Lano ngin ioh jingshai halor kitei ki Act ki Rule bad hato ki dei ne em kiba da ia dei dur katkum ka juk mynta. Hato la shim ne em ia ki jingai jingmut kiba paw ha ka kaiphod ka Commission, UK&JHADC kaba la thung kyrpang ban bishar ki jingeh ka Hima Mylliem ha u snem 1957. Kaei ka daw ba kam shym don kano kano ka jingpyntreikam ia ki jingai jingmut na ka Commission UK&JHADC kaba 15 tarik February 1957.
La kyrpad jur ia u Chief Executive Member bad ka Executive Committee, KHADC baroh kawei ban lum ia ki rangbah jong ka Hima Mylliem ha ryngkat ki MLA bad MDC ka Hima Mylliem ban ia kren halor ka jingeh kiba la pynpaw da ka Seng Samla Mawlai Pyllun kaba ktah ia baroh ki khun ki hajar lyngba ka zoom lane google meet.
