Shillong, Risaw 31: Ka Khasi Students’ Union ka pynpaw ia ka jingsngewsih kthang halor ka jingkhlad noh jong i Meiieid Spility Lyngdoh ha ka 29 tarik u Risaw 2020. Ka seng ka don ka jingiadei kaba jan bha bad i Meiieid lem bad ka iing ka sem ka jong i namar kumba long ka KSU, i Meiieid Spility ruh i ieng ha kajuh ka nongrim, kata ba pyrshah dohiap dohim ia ka jingthmu ka sorkar India ban khlong ia u marpoh khyndew Uranium na Ri Khasi.
Ka KSU ka shem ba i Meiieid Spility i long iba iohi jngai bad ba shemphang haduh katta katta namarba wat hapdeng ki jingtynjuh, jingpynbiej bad jingpynshoi im shym la ngat ha ka liewlep kumba la ngat kiwei, pynban i iengskhem hala ka nongrim bad jop thiaw ia ki buit kohtympan ki riewbymman.
Ka jingiohi jngai jong i ka la iada shikatdei eh ia ka Jaidbynriew Khasi namar lyngba ka jingpyrshah tih Uranium ka jong i, shibun bah ki paid ka Jaidbynriew ki la ioh mynsiem bad ki la lait na ka tyrsim jong ka jingpang jingshitom, ka jingiap bad ka jingshah knieh noh ia ki jaka ki puta.
Wat la ka sorkar ka la pynshitom ia i bad kito kiba iahap jingmut bad i da ka jingiehbeiñ jingieh khunswet kum ka jingbym maramot ia ka surok, ka jingbymbiang ki jaka ai sumar, jaka ai jingpule bad kumta ter ter hynrei ki kloi ban im ha ka jingim ba sahdien ban lait na ka nemsniew bad ka khlam bah. Wat ka bor jong ki tyngka ba da ki klur ruh kim lah ban pynkhih ia ka jingskhem jingmut ka jong i.
Ka KSU ha kum kane ka sngi kaba sngewsih ka pynpaw ia ka jingduh kaba khraw tam ia iwei na ki rishot baskhem jong ka hok ka Jaidbynriew. Kham ñiar ban shem ha kum kane ka juk kaba mynta ia ki briew kiba len ia ka spah rongphong pyrthei na ka bynta ka bha ka miat bad ka lawei ba phyrnai bad ka jingkhlad ka jong i ka dei ka jingduh kaba khraw ym tang ia ka Jaidbynriew Khasi hynrei ia baroh shityllup ka pyrthei khamtam ia kito kiba ieng rasong na ka bynta ka hok longbriew manbriew.
ka KSU ka ai khublei khatduh ia i ha ka jingjam noh ka jong i sha ki ksangkti u Trai Kynrad bad ka ngeit ba nangne shakhmat kin dang mih shuh shuh ki Spility Lyngdoh ban iada ia ka Jaidbynriew Khasi, kane ka long katkum ka kyrwoh kaba la phah da u general secretary jong ka seng KSU.
