Shillong, Jymmang 31: Na ka liang ka Seng ngi pynpaw ia ka jingsngewkhia halor ka jingkiew stet jong ki nongshong shnong kiba ia bit ia u Khniang Jingpang Covid-19 ha kane ka Jylla.
watla ka Sorkar ka lah shim ia ki lad ki lynti kumno ban teh lakam ia ka jingpur stet jong une u Khniang Jingpang hynrei la iohi ba kat nang wan ki sngi kane ka jingpang ka lah nang pur stet ha man la ki shnong ki thaw khlem da khein shuh la ki dei hapoh sor ne sha nongkyndong.
Ha kum kane ka por kum ka seng HYC ka kwah ban pynpaw ba lehse kawei na ki daw jong ka jingpur stet une u Khniang jingpang ha kane ka Jylla, khamtam ha Nongkyndong kadei namar ka jing wanphai ing noh jong kiba bun ki Nongshong shnong na kiwei pat ki Jylla la ka long kiba leit pule ne kiba trei ba ktah bad kumjuh ka jingbym bud ryntih jong ki Nongshong shnong ia ki Kyndon bad jingbthah jong ki bor Sorkar.
Ym lah ban khang ne pyrshah ia ki Nongshong shnong jong ka Jylla ba kin wanphai biang sha la ki Ing ki sem ha kumne ka por hynrei kum ka Jylla la dei bad hap pat ban shim ia ki lad ki lynti kiba paka bad ba skhem ban iada ia kiwei pat ki Nongshong shnong ha la ki dong bad ki shnong.
Ka Sorkar ka lah pynmih ia ka hukum ba kito kiba wanphai na kiwei ki Jylla ki hap ban leh ia ka RTPCR Test ha ki khyrdop hashwa ba kin rung shapoh ka Jylla kum ha Umling, Ri Bhoi Distict.
Hynrei ban ioh ia ka Kaiphod la u ne ka briew ka lah ioh ia kane ka Jingpang ne kim shym don ia ka jingpang, la hap ban ap kumba 24 haduh 48 kynta. Kumta la shah ia kiba wanphai ba kin rung shapoh ka Jylla bad ba kin leit sha la ki jong ki shnong ki thaw bad ki ing ki sem da kaba bthah ruh ba kidei ban pynkyrpang ialade kumba hynniew sngi ei ei.
Hapdeng kine ki 24 haduh 48 kynta shuwa ban ioh ia ka kaiphod, haduh katno ngut kine ki briew ki lah ia kynduh ia kiwei pat ki briew ha ka jingiaid lynti ka jong ki ban poi sha la ki Ing ki sem.
Lada jia ba ka Kaiphod ka pyni ba u ne ka briew ka lah ioh ia kane ka jingpang haduh katno ngut kiba kum kitei ki briew ki lah pynsaphriang ia kane ka Jingpang. Kum ka nuksa ha kine ki sngi kiba lahdep lahdon uwei u briew uba wanphai na ka Jylla Assam uba dei u Nongbylla sngi.
Ynda u lah poi ha Shillong, u lah kiew da ka Kali iew kaba kit nongleit nongwan bad ki don kumba 6 ngut kiba shong lang ha katei ka Kali kaba mih na Shillong bad iaid lynti kumba 3 kynta ei ei ban poi sha shnong.
Ynda lah poi mynmiet ha katei kajuh ka sngi lah ioh jingtip ba une u briew u lah ioh ia kane ka jingpang namar ka kaiphod ka pynpaw ba u long positive. Kane ka lah pynkulmar ia kiba bun namar ia kine kiba ia shong lang ha ka kali lah hap ban ia wad bad pynshong kyrpang ym tang ia ki hynrei ia ki bahaing hasem lang baroh.
Hato kane kam buh jingma ia ki Nongshong shnong lang baroh? Hato kane ka jingpyllait bad shah ban iaid ban ieng kine ki briew da ki kali paidbah ka long kaba dei? Ngi ngeit ba kine kiei kiei ki dei ki daw kiba pynlong ba ka Jylla ka jong ngi kan kiew stet bha na ka jingdon jong ki briew kiba ioh ia kane ka Jingpang.
Namar ym baroh kiba na kine ki briew kiba wanphai sha ka Jylla kiba lah ban wan da ki kali shimet ki jong ki ne ki kali kiba kyrpang kiba lait na kaba iakhleh bad kiwei pat ha ka jingiaid lynti ka jong ki tad haduh ban da poi ha la ki ing ki sem ne ki shong ki thaw.
Kumta, ngi kyntu ia ka Sorkar ba kidei ban thawlad lynti ban pyntikna ba ki briew kiba wanphai ne wan rung hapoh ka Jylla kidei ban long ki bym don ia katei ka Jingpang ne lada dei ban ap ia ka Kaiphod kumba 24 haduh 48 kynta, ia kiba kum kine ki briew dei ban phah shong kyrpang shuwa ha ki jaka ba kyrpang kiba lah pynkhreh da ka Sorkar tad haduh ban da ioh ia ka Kaiphod.
Lada jia ba ka kaiphod ka pyni ba ki don ia kane ka jingpang, ym dei ban shah ia ki ba kin leit phai sha ki Shnong ki thaw khamtam ha Nongkyndong lada kim don ka jaka kaba tikna ba ki lah ban sumar bad shong pynkyrpang ialade. Kane lehse kan dei kawei na ki lad ki lynti ban pynsuki bad pynduna ia ka jingspur stet jong une u Khniang jingpang ha kane ka Jylla ka jong ngi.
Na ka liang jong ka seng HYC ka ngeit ba ka Sorkar kan shimkhia bha halor kane ka jingai jingmut ka Jong ngi na ka bynta ka bha ka miat jong ki Nongshong shnong ka Jylla hi baroh kawei, la ong u bah Roy Kupar Synrem General Secretary ka seng ha ka kyrwoh.
