Shillong, Rymphang 28: U MDC ka Laitkroh Langkyrdem Constituency u Bah Shemborlang Rynjah u la jop suk ia ka election ban jied Chief Executive Member jong ka Khasi Hills Autonomous District Council khlem da don ka jingiakhun hadien ba ka liang pyrshah kam shym la pynieng kyrtong.
Haba sdang u Chairman ka Council u Bah Strong Pillar Kharjana u la pynbna hapoh ka iing dorbar jong ka KHADC ba u la ioh pdiang ia ka jingthep kyrteng tang jong u Bah Shemborlang Rynjah iakaba la tyrwa da u MDC ka Pariong Mawthadraishan u Bah Powell Sohkhlet bad u MDC ka Nongkrem u Bah Kitbor Syiem.
Namar ba ym don ba iakhun pyrshah, kumta u Chairman ka Council u Bah Strong Pillar Kharjana u la pynbna ia ka kyrteng jong u Bah Shemborlang Rynjah kum u Chief Executive Member ba thymmai jong ka Khasi Hills Autonomous District Council.
Hadien ba la pynbna jop ia u Bah Shemborlang kum u CEM, u MDC ka Sohra u Bah Titos W Chyne u la synran ia u CEM ban leit shimti ia ka shuki ha ryngkat bad ka jingai sngewbha da ka jain ryndia.
Haba kren ai khublei halor ka jingjop u Bah Titos W Chyne u la pynpaw ba kum ki dkhot ba pura jong ka iing kim don satia ka jingniew shilliang la ki dei ki dkhot kiba la jop bun sien ne ki dkhot ba dang shu jop thymmai namar ba ia baroh la jied hi da u paidbah.
“Baroh ki 29 ngut ki MDC ki don ka jingshaniah ia u CEM, kumta u la kyrpad ba un pyniaid iaka council khlem jngthut wat lada shibun ki jingeh un iakynduh namar ba ka liang pyrshah kan ia trei lang ryngkat bad ka Executive Committee kaba thymmai” ong u Bah Titos.
Ka Kong Grace Mary Kharpuri kala pynpaw ba baroh 29 ngut ki MDC ki pdiang ia ka jingshah jied u Bah Shemborlang Rynjah kum u CEM ka Council bad la kyntu ruh ba un pyniaid beit pyniaid ryntih ia ki kam jong ka council ha ki tnad trei kam bapher bapher.
Na ka liang u Chairman jong ka Council u Bah Strong Pillar Kharjana, kum u CEM ka kam kadei kaba khia bha bad baroh ki dkhot jong ka iing dorbar ki long kum ki para jong u CEM, kumta donkam ban peit lang ia ki para MDC namar ka jingle marwei ka lah ban poi sha kaba bakla.
Haba jubab u Bah Shemborlang Rynjah u la pynpaw ba ka jinglong Nongmih khmat kam dei ka kam ba don kyrdan, hynrei kaei kaba un leh kadei ban kit ia ka lyngkor na ka bynta ka imlang ka sahlang.
“Ka ophis jong u CEM kan plie kylluid ban ia rung katba ia sngewbit, namar ba ngam lah ban kam trai ia ka ophis namar namar ba kadei jong u paidbah bad u la pynpaw ruh ba u kloi ban pdiang ia ki jingai jingmut na ki dkhot ba la rim jong ka iing” ong u Bah Shemborlang.
