Shillong, Nailur 25: Ka KSU South West Khasi Hills District ka kwah ban pynshai ba ka jingong 
jong u Chief Minister u Conrad Sangma bad ka kaiphod jong ki bor sorkar ba kam don ka jingorpait jong ki jaka buh jakhlia uranium ha Nongbah Jynrin, South West Khasi Hills District ka dei ka jingialam bakla iaki paitbah bad buhrieh iaki jingshisha.
Naka liang jongka KSU South West Khasi Hills District Unit ka pynshai, ba hadien ba ki lah iohi ha ki social media ba ka don ka jingorpait haki jaka buh jakhlia uranium ( Uranium ore tanks) haka sngi u blei 21 tarik, Ka seng ka la phah iaka kynhun jong ka ban leit sha kato ka jaka ban lap iaki jingshisha.
Haka jingleit jurip jong ki dkhot jong ka seng la lap ba ka don ka Jingorpait jong kine ki jaka buh jakhlia uranium bad ka don ka jingiapher jong ka jingorpait haki por mynshwa bad mynta namar mynta ki iohi ba ki thliew ruh ki lah heh ban ia Nujor bad ki por ba mynshwa.
Watla ka seng kam pat ai kano kano ka jingpynkut la ka don jingbthei ne em namar ha kato ka sngi kim pat lah ban leit lut sha baroh ki jaka na ka daw jong u slap uba jur ha kato ka sngi hynrei kawei ba ki tip shai ka long ba ka don ka jingpei thliew bad haba don ka jingpei thliew ka long ba kim don ka jingartatien.
Haka jingieit jurip jong ka seng KSU ha kato ka sngi, ym dei tang ki dkhot ka seng kiba Leit hynrei la don lang na ki lat pathai khubor khnang ban lap iaki jingshisha. Ka seng ka sngew lyngngoh ruh iaka jingkren jong u Myntri Rangbah ba u la pyntip ia kane sha ka AMD bad UCIL.
Na ka liang ka KSU ka kwah ban buh jingkylli iaka sorkar Meghalaya kumne ” Shaei jah ka sorkar Meghalaya ne ka Independent Enquiry jong ka sorkar jylla ha kaba ka hap ban pyntip shaki,Hato don eiei shalyndet halor kane.
Halor ka jingong ba ka Khubor ba pait kane ka jaka buh jakhlia ka dei ka Khubor hamsaia ( Fake news) watla hadien ba ki lad pathai khubor lem bad ka seng ki la lah ban sei iaki jingshisha ka dei ka jingpyrshang ban kynnoh ia ki dei ki nong pynsaphriang iaki Khubor Hamsaia.
Haba iadei bad kane ka seng ka kwah ban pynshai ba kim ju Kren iaka hamsaia ki rngai hynrei ki kwah ban wanrah bad pynpaw paitbah ia ki jingshisha kumba ka long khnang ba u paitbah ka jylla kin tip iaki jingshisha.
Ka sorkar ha ka jaka ba kan pynbeit ne maramot bad pynthikna wut wut ka seng ka iohi pynban ba ka dei ka nongialam bakla ia u paitbah. Shaei ka bynta jong ki kum ki nongialam. Ka KSU ka kwah ban buh jingkylli shaka sorkar ban kren iaki jingshisha.
Ka seng KSU ka kynthoh ba jingkam ba kam don ka jingorpait ha kane ka jaka buh uranium ka dei ” Ka Jingthok jingshukor kaba palat iaki jingthok jingshukor baroh ” la ong u samla Forwardman Nongrem, President, KSU South West Khasi Hills District.
