Shi
llong, Naitung 03: U Bah Lamphrang Blah MDC jong ka Mawphlang ha ka jingkren ka jong u ha ka jingialang ban pynshai paidbah kaba dei bad ka koit ka khiah jong ki khynnah ha ka shnong Mawlaingut, Diengiei u la ong ba ka daw bah jong ka jingkhlad ki khynnah kiba hapoh ka san snem ka dei na ka jingpang pri pynhiar.
Ia kane ka jingialang la khot da ka tnad ka koit ka khiah jong ka sorkar jylla ban pynshai paidbah ha kaba ia dei bad ka jingai jingsumar ia kaba la tip kum “Intensified Diarrhoea Control Fortnight “ 2018 ha shnong Mawlaingut, Diengiei, jong ka East Khasi Hills District.
Ha ka jingkren na ka liang jong u Bah Blah u la ong ba dei ban long ki briew kiba leh khuid ban iada na kane ka jingpang bad u la kyntu ia ki khynnah skul ba ki dei ban long ki nongrah ktien ha kaba pynphriang ia kane ka khubor jong ka jinglehkhuid sha kiwei. Ha kane ka sngi la sam ruh ia ki khusnam ha ka jingiakop ban kren halor kane ka phang.
Ia kane ka jinghikai la pynlong da ka District Health Society, NHM, East Khasi Hills District bad kiba la wan ban ia shim bynta ki long u Dr. J. B. Ranee, District, MCH Officer, East Khasi Hills, ka kong O. Sumer, DHEO, East Khasi Hills, Dr. L. Syiemlieh, Medical & Health Officer, ba dei peit ia ka Diengiei PHC, u W. Pamdhai, District Programme Manager bad kiba la ia don lang ki long ki khynnah skul bad ki nonghikai na katei ka thain.
