Shillong, Lber 06: ka kynhun kaba na Hyderabad kaba la ai kyrteng DisneyLand Mela Private Limited kan long ha ka sien kaba nyngkong ba kan wan ban pyni nam ia ki jait dohkha na kylleng ka pyrthei kiba don haduh shilak shiteng ha madan Polo ka ban neh shi bnai lynter.
U Shamim Shaikh u ba pynbeit ia kane ka jingpyni nam ia ki dohkha u la ong ba kane kan long ka sien kaba nyngkong ba kin pynlong ha nongbah Shillong ha kaba ki dohkha duriaw ba bun jait naduh kiba rit kiba tang shi inshi haduh kiba heh hynriew phut la buh ba ki paidbah kin iohi ia ki dohkha kiba im ha la ki dur ki dur bad ha la ki rong ki rong.
Ha kane ka jingpyni nam ia ki dohkha ba im u ba rem duh ka dor u dei u Platinum Alligator Gar u ba shongdor phra lak tyngka u wei bad ha kane ka jingpyni nam ki don saw tylli ia kaba la wanrah ia ki na ka wah Amazon South America, kiwei ki dohkha la wanrah na wah Nile ka ri Egypt, na Japan bad na kiwei ruh ki ri.
U la ong ba ia kane ka jingpyni nam ki la leit kylleng kylleng ka Ri India bad ka jingthmu jong kane ka long ban ailad ba ki paidbah ba kin iohi ia ki jait dohkha bapher bapher kiba im kiba dei na kylleng ka pyrthei bad khmih lynti ba ki paidbah ka jylla Meghalaya khamtam ki paidbah nongshong shnong ka sor Shillong kin shim ia kane ka kabu ban wan peit bad sakhi da la ki jong ki khmat.
Na ka liang jong ka kompeni ban ailad ia ki paidbah kala buh ia ka dor jong ka bai tiket ar spah tyngka marwei ia kiba la saw snem shaneng la iathuh ba ha Singapore bad ha Dubai ban leit peit ia ka jaka buh nam ia ki dohkha ha ka pisa India ka long hynriew hajar tyngka marwei.
