Shillong, Kyllalyngkot 11: U Nongialam ka liang pyrshah ha ka iing dorbar thawain ka jylla u Dr. Mukul Sangma ba dei ruh u myntri rangbah ba rim ka jylla bad u bala bat ruh ia ka kam myntri pla pisa ha ha ka jylla la ong ba kane ka jingpynkjylla ia ka rukom bei pisa ha kaba ia dei bad ka skhim bylla shispah sngi kam dei ba ka ktah tang ia ka jylla Meghalaya hynrei baroh ki jylla North East, wat ia ka jylla Assam ruh kum juh.
U nongialam ka liang pyrshah ha iing dorbar thawain ka jylla, haba jubab ia ki jingkylli ha ka 10/ Kyllalyngkot/2026 ha jingiakynduh bad ki nongthoh khubor ha Shillong Press Club u la ong ba na ka bynta kito ki jylla kiba bun jingmih kan nyn don kano kano ka jingktah hynrei haba phai sha Meghalata kan ktah bha bad ia ki jylla kane ka thian shatei lam mihngi.
U Dr. Mukul u la ong haba ka sorkar pdeng haba ka wan rah ia kano kano ka skhim kaba thymmai ka hap ban peit na baroh liang namar ym baroh ki jylla kin long kum juh ha ka ioh ka kot, lane haba ka sorkar pdeng ka pynkylla ia kano kano ka skhim kaba la don sha kawei ka hap ban peit ba ka jingmyntoi kan longia baroh.
Na kata ka daw man ka por ba ki ia kren bad ka sorkar pdeng, ha ba ia dei bad ka jingbei pisa ia ki skhim khamtam na ka bynta ki jylla kane ka Thain Shatei Lammihngi ka sorkar pdeng ka hap ban sngewthuh namar kine ki jylla ki dei kiba duna ka jingmih.
Kane kajingkren jong u Dr. Mukul ka long ha kaba ia dei bad ka skhim Mahatma Gandhi National Rural Guarantee Act kaba la tip kum ka bylla shispah sngi kaba la bei pisa 100% na ka sorkar pdeng ia kaba la pynkylla sha ka Viksit Bharat—Guarantee for Rozgar and Ajeevika Mission (Gramin) Act, 2025 ha kaba ka jingbei pisa kan long 90% na ka sorkar pdeng bad 10% na ka sorkar jylla.
