Shillong, Naiwieng 15: U Myntri Sorkar Pdeng ba dei khmih ia ka tnad Civil Aviation, Rammohan Naidu Kinjarapu, u la iashim bynta ha ka jingrakhe ia ka JanjatiyaGauravDiwasha ka sngi kaba ar ba u don ha nongbah Shillong mynta ka sngi.
Ia kane ka prokram la pynlong da ka State Rural Employment Society bad ka tnad C&RD, ha State Convention Centerha Shillong. Ha kane ka sngi la wan iashim bynta lang u Myntri Rangbah ka jylla Meghalaya, Conrad Sangma, ki nongialam riewlum, ki kynrem ki lyndanna ka jaitbynriew Khasi, Garo bad Jaintia.
Ha ka jingai jingkren, u Myntri Sorkar Pdeng u la ong ba u sngewnguh ban ioh ban rakhe ia ka bynta kaba saw jong ka Janjatiya Gaurav Diwasha Meghalaya. “Kane ka dei ka sngi ai burom ia ka kam ba khraw jong u Birsa Munda, u riewlum ba la iakhun na ka bynta ka jinglaitluid ka ri.
Ka jinglenlade jong u ki bteng ban ai mynsiem ha ka jingiakhun na ka bynta ka hok, ka jingiaryngkat kyrdan bad ka jingiada ia ka jinglong bad ka deiritiriewlum,” u la ong.
U Myntri u la ai jingsngewnguhia ka jingshlur jong ki riewlum kiba la lenlade ban tei ia ka lynti jong ka ri sha ka jinglaitluid bad kiba la trei borbah ban pynneh ia ka mariang bad ka deiriti.
“Ha Shillong, hapdeng ki Khasi, Garo, bad Jaintia—ngakmen ban iohiia ka jingpynneh bad ka jingkyntiew ia ka deiritiriewlum. Dang shennga la wan sha ka East Khasi Heritage Village bad nga la itynnadbha ia ka jingieng skhem ban pynneh ia ki ‘law kyntang bad ka mariang, ka jinglong kaba la hiar bun pateng. “Ka jingiada ia ka mariang ka dei ka jingngeit kaba kongsan ba ki riewlum ki la ai pateng bad ka don ka jinghikai kaba kongsan ia baroh ki briew.”
U Myntri u la kdew ruh ia ka jingiaid shaphrang hapoh ka jingialam u Myntri Rangbah Duh, Narendra Modi bad u Myntri Rangbah Conrad Sangma, khamtam ha ka jingpynbiang ia ki jingdon jingem, ka pule puthi bad ki lad ioh jingsumar ia ki riewlum.
U la ong ba ka Sorkar Pdeng hapoh ka jingialam jong u Myntri Rangbah Duh Modi, ka la buh kyrpang T 70,000 klur ha ka shi snem na ka bynta ki scholarship ia 30 lak ngut ki khynnah riewlum ba dang pule, ka la shna 1.5 klur tylli ki painkhana na ka bynta 58 lak tylli ki longiingriewlum hapoh kaSwachh Bharat Mission, bad ka la ai jingmyntoi ia 1.2 klur ngut ki nongrepriewlum hapoh ka PM KisanYojana.
U la ong ruh ba ka jingbei tyngka na ka bynta ka bha ka miat jong ki riewlum ka la kiew na ka T 24,600 klur ha u 2014 sha ka T 1.23 lak klur ha u 2024, kaba long ka jingkyntiew kaba san shah.
U Myntri u la ong ruh ba palat 4.6 klur ngut ki riewlum ki la shah screen na ka bynta ka jingpang sickle cell anemia, ka jingpang kaba ktah bha ia ki riewlum. La tei ia ki museum ban pynkup burom ia ki nongialam riewlum, ka deiriti bad ka jinglong tynrai jong ki bad la ai T 24, 000 klur ban kyrshan ia 45 lak kiba ioh jingmyntoi PVTG hapoh ka PM Jan Man Yojana.
U la kren ruh shaphang ka jingbun ki skul Eklavya Model Residential, kiba pynbiang ka jingpule kaba bha ia ki khynnah riewlum kaba la kiew na 123 tylli ha u 2014 sha 476 tylli ha kylleng ka ri kiba ai jingmyntoi ia ki phew hajar ngut ki khynnah riewlum ba dang pule.
“Ka Sorkar ka la kyrshan ruh ia ki nongrep bad ki nongseng kam lajong kiba dei ki riewlum, ha kaba ki mar khlaw kiba ioh ia ka Minimum Support Price (MSP) ki la kiew na 12 sha ka 87 tylli kaba plie ia ki lad kamaijakpoh ba thymmai ia ki riewlum,” la ong u Myntri.
U Myntri u la ong ba u sngew sarong ban iadon bynta ha kane ka jingrakhe ha Meghalaya, ka jylla kaba riewspah ha ka deiritiriewlum.“Kane ka jingwan jong nga ka la ai shibun ki jinghikai ia nga.Ngan shim ia kine ki jinghikai ba nga la ioh hangne bad pyndonkam ia ki ban ai jingshakri ba kham bha ia ki briew jong nga,” u la ong.
Ha kaba iadei bad ka bynta jong u kum u Myntri ka Tnad Civil Aviation, u Myntri u la kdew sha ka jingdonkam ban kyntiew ia ki lad ka leit ka wan ha ka thain shateilammihngi, khamtam ha Meghalaya. U la kularia ki briew ba ka Sorkar India ka la kut jingmut ban kyntiew ia ki lad ka leit ka wan lyngba ki liengsuin ha kane ka thain.
U la kren shaphang ki jingpyrshang ka Sorkar ban kyntiew ia ka kad liengsuin Shillong khnang ba ki liengsuin ba kham heh ki lah ban wan sha kane ka kad liengsuin bad kumta, ki briew nangne ki lah ban leitbeitbeit sha Delhi.
U la kyrshan ruh ia ka jingthmu jong u Myntri Rangbah, Conrad Sangma ban kyntiew ia ki lad ka leit ka wan sha Tura bad kiwei kiwei ki jaka jong ka jylla kiba jynjar ban poi, ba kynthup ia ka jingwanrah ia ki liengsuin kiba lah ban pynher na ki jaka shongum.
“Ngi sngewthuh ia ki jingeh kiba wan namar ka jinglong jong kane ka jaka, bad ngi kut jingmut ban kyntiew ia ka Meghalaya kum kawei na ki nongialam ha ki kam pynherliengsuin. Ka jingpyniar ia ki kad liengsuin bad ki lad ka leit ka wan kiba kham bha kin plie ia ki lad ka ioh ka kot jong ki briew ka Meghalaya,” la ong u Myntri.
U Myntri Rangbah Duh, Narendra Modi u la pynsdang ia ka jingrakhe kaba shi snem ia ka lyngkhuh sngi kha ba 150 jong u BhagwanBirsaMundaha ka JanjatiyaGaurav Divas bad u la buh maw nongrim ia ki projek bapher bapher na ka bynta ka roi ka par kiba kot sha ka T 6,640 klur ha Jamui, Bihar mynta ka sngi.
Ka prokram ha Jamuika dei kaba la live stream sha kylleng ka ri ba kynthup ruh ha Shillong ha kaba la don ka jingiashim bynta ha ki distrik bapher bapher jong ka Meghalaya.
