Shillong, Iaiong 13: Mynta ka sngi ka seng HYC seng kmie ka la leit ban aiti ia ka jingthoh sha u Chief Secretary la kylla u bah DP Wahlang halor ka Roster ha ophis treikam.
Haba kren ha ki lat pathai khubor ha dien ka jingiakynduh ia u Chief Secretary u bah Robert June Kharjarin President ka HYC seng kmie, la ong ba kila don ki paralok Garo kiba la leit ban ujor da ka PIL sha iing bishar ban kyrpad ba ym dei shuh ban dang don mano mano ban mushlia ia ka Roster.
U President ka HYC la ong ba kumba la paw na ka rai jong ka iing bishar jng ka High Court jong ka jylla Meghalaya, ka paw kumba ka sorkar Meghalaya kam pat buh ia kata ka snem pyntrei kam, kaba mut naduh myno bad lano yn sdang ban pyntrei kamia ka Roster, ka iing bishar ka ieh ha ka jingstad jong ka sorkar bad ka dorbar thawain.
Ka seng, dei hadien katei ka jingong ba na ka liang ka seng ka dawa bad ka wan buh ia ka jingthoh ban dawa na ka sorkar ba lada dei ban jied naduh kano ka por kata ka Roster kan treikam Kumba la bthah da ka HCM. Ka seng ka kwah ba ka Roster kan treikam beit thik.
U la ong kane ka jingdawa ba ka seng ka kwah kam dei kaba shu dawa biej ne khlem don nongrim hynrei ka seng ka la pynshong nongrim katkum ka rai ba la mih na ka Supreme Court ha ki ba bun ki cases. Ka case ka ba kham Kongsan eh ka dei jong u snem 1995 ha ka jylla Punjab.
Ha kaba ha Kato ka por ka Supreme Court ka la kren shai ba lada pyntreikam ia ka Roster ka dei ban iaid shakhmat. Namar balei, Kumba la tip ba ka Ri India ka dei kaba la don naduh 1947 bad ha ka 1950 la wan noh ka constitution jong ka Ri India bad kane ka jingai ST, SC ruh ka treikam naduh u snem 1950.
Ka jingbuh mang kyrpang ruh ka dei hi naduh u snem 1950, hynrei ha ka por ba ka courts kren ha Kato ka cases 1995 kam ong ban pyntreikam ia ka Roster ban iaid naduh u snem 1950, 51 ter ter. Hynrei ka batai ba dei ban iaid beit naduh u 1995 sha jrong. Te dei halor kata ka nongrim haba my shawa ka Ri India ka la leh kumta.
Ha Meghalaya ruh ka dei hi ban leh kumjuh namar balei ha Meghalaya la sdang ia ka Roster naduh u 2022 te ka Roster ka dei ban iaid beit shakhmat dei halor kata ka nongrim kum ka seng ka ai jingthoh ha u Chief Secretary ka jylla u ba long kum u khlih ka sorkar.
Kumjuh ruh ka seng ka la ai kotpi ruh da kane ka juh ka jingthoh sha u Chief Minister sha baroh ki Minister bad sha baroh ki nongialam ki political party ba pher ba pher khang ba kin ioh ban iatai khambha ia kane ha ing dorbar kumba u Dy CM u la pynpaw ba kan sa don ka jingiakynduh jong baroh ki party halor kane.
Na ka liang ka seng u la ong ba ki don sa kiwei pat kimat, nalor kata kaba ong prospectively implementation of Roster ki don sa kiwei pat ki mat ba ha kine ki sngi, ba kum ka seng kam sngew iahap katkum ka Reservation Policy, kawei na ki mat ka dei na ka jingshah kut ha kaba ka don ka jingsdang ban thung ia kiba dangsah ia kita ki kynhun jong kano kano.
Ka seng ka la pynkynmaw ia u Chief Secretary ba katkum ka Reservation Policy “Ka don ka bynta ba lada kano kano kano ka category ka bym lah ban pyndap ia kano kano ka post ia kata ka post yn ioh noh da kawei pat ka category bad ha ka jingthep kam ka ban wan pat sa ka jingpynbeit ia ka.
Te hynrei lada ymlah ba thep ha kata ka kam ka ban wan kata ka kam kan kut noh, haba ka kam ka la kutnoh kumno yn dang thung pyndap pat ha kita ki kam, lada ka don ka jingbym lah ban pyndap kam dei ba shah pynduh hynrei dei ba kim don briew kiba la biang ha ka kam ba dei ban thung, la ong u bah Robert.
