Shillong,Rymphang19: U Myntri ba dei peit ia ka tnat kam bor ding u bah Metbah Lyngdoh haba jubad ia ka jingkylli u la buh da u bah Paul Lyngdoh u la ong ba ka bor trei kam jong ka Meghalaya State Electricity Regulatory Commission la pynkup bor hapoh ka kyndon kaba 86 jong ka Ain Electricity Act 2003.
Kumba ka long mynta ka MSERC ka dei ban don ar ngut ki dkhot, u wei u shongknor bad u wei u dkhot hynrei ia mynta don tang u wei bad kawei ka long thylli bad ha ka Electricity Act 2003 ha ka kyndon kaba 108 la ai bor ba ka sorkar jylla ka lah ban tuklar.
Haba jubab ia ka jingkylli bynrap u myntri u la ong ba ka Electricity Act 2003 ka dei ka ain jong ka sorkar pdeng ka sorkar jylla ka la pdiang ia ka ban pyntrei kam ha ka 26/Lber/2004 bad ka ophis ka la sdang ban trei kam ha ka 6/Jylliew/2006.
Kawei na ki kamram kaba ha khmat eh jong ka MSERC ka long ban buh ia ka dor bai light hapoh ka jylla, ban thied ia ka bor ding na shabar ban pynpoi sha ka jylla bad la dei ban die ia ka bor ding shabar ka jylla kaei ba ka sorkar jylla ka leh ka long ba ka siew ia ka tulop jong ki nongtrei bad ka pynbiang ia ka jingdonkam ka ophis.
Ka MSERC man la u snem ka juh pynlong ia ka jingiakynduh bad ki paidbah shwa ban shim ia kano kano ka rai ha kaba ia dei bad ka bai light lada don pat haba don kano kano ka jinglip light ka MSERC kam lah ban shim ia kano kano ka rai ban pynshitom.
