Shillong, Jymmang 25: U Bah Titosstarwell Chyne Chief Executive Member jong ka KHADC mynta ka sngi u la pyntip ba ka Executive Committee ha ka jingiakynduh lang kala shim ia ka rai ban ai jingiarap ia kito ki “Community Quarantine Centre” kiba buh da ki shnong.
Haba kren ha ki lat pathai khubor mynta ka sngi u la ong ba, la bthah ia baroh ki dorbar shnong kiba hap hapoh jong ka jingpeit jong ka KHADC kiba don ia ki jaka pynsah ia kiba wan phai sha la shnong ba kin phah ia ki aplikoshon jong ki lyngba ki MDC jong ki bad ban pynpoi sha ka KHADC ha lane shuwa ka 30 tarik mynta u bnai.
Na ka liang jong u CEM jong ka KHADC u la ong ba katno kin ai jingiarap ia kata kim pat lah ban ong, hynrei u la kren shai ba ka jingiarap kan long katkum ka jingdon jong ki briew kiba shah ha kito ki jaka. Ynda la ioh ia ki aplikoshon ynsa lah ban ong kat no tylli kin don ki Community Quarantine Centre.
Na ka liang jong u CEM, u la ong ba ka sorkar kala leh ia ka bynta jong ka ha kaba kala pynbiang ia ka jingdon kam jong ki kito ki jaka, kane ka rai jong ka KHADC ka long tang ban ia noh syniang lang na ka liang jong ka KHADC sha kito ki dorbar shnong kiba don ia jaka pynsah ia ki briew kiba wan phai sha la shnong.
Haba ia dei bad ka jingshah pyndik jong ki briew ha Bihar na ka liang jong ka KHADC ka pynrem jur ia kito ki briew kiba la leh ia kane ka kam bad la niew ba ki dei kum ki riew khlaw. Na ka liang jong ka KHADC ka kyntu ia ka sorkar ba kan shim khia ba kan nym jia shuh ia ki ban dang wan phai.
