Sohra, Risaw 24: Ka kong R Synrem ka kmie jong u Balajied Kupar Synrem kala ong ba kane ka jingjop u khun jong ka ia kane ka ilekshon shiteng samoi na 26-Shella Konstitwensi ka pyni ba ki paidbah ki dang ai jingshaniah ha ka iing ka sem jong ki.
Haba kren ha ki lad pathai khubor ha dien ba la thikna ba u bah Balajied u la jop ia kane ka ilkehson shiteng samoi, ka kong Synrem ka la ong ba kane ka jingjop kan pynthikna ba u khun un pyndep ia ki kam kiba dang sah teng kiba u kpa u la ieh sha dien.
Kala ong bad a kane ka jingjop ka ngiet skhem ba u khun jong ka un dang trei shitom shuh shuh ban ai ka jingshakri ia ki paidbah kumba ki paidbah kila ai jingshaniah ha ka iing ka sem jong ki.
Kum ka kmie kala ong ba ka ai khublei kyrpang ia ki paidbah kiba la ai ka jingjop kaba don burom, ia ki nongialam jong ka party UDP, ki nongkyrshan baroh kiba la iatrei shitom ban wanrah iakane ka jingjop ha kane ka ilekshon shiteng samoi.
U Dr Jemino Mawthoh General Secretary jong ka party UDP u ba la ia don lang, na ka liang jong u ruh u la ai khublei ia ki paidbah kiba la pynjop ia u kyrtong jong ka party ha kane ka ilekshon shiteng samoi bad ia baroh ki nongtrei jong ka party kiba la ia trei shitom ban wan ia kane ka jingjop kaba don burom.
Haba ia dei bad ka jingtam bun, u Dr Jemino u la ong ba na ka liang jong ka party kala thikna ba kan jop ia kane ka ilekshon, hynrei ka jingtam kaba la bun bha kim shym la khmih lynti ba kan palat ia ka 6000 vote.
