Shillong, Jymmang 12: Mynta ka sngi na ka liang ka KSU Malki Circle ha ka jingiatrei lang bad ka Forest and Environment Department Malki Beat Office , ka kwah ban pyntip paidbah ba la khang noh shi syndon ia ka jingrung jingmih jong ki briew sha kane ka Khlaw Malki kaba hap hapoh ka Laitkor Protected Forest Area kat kum ki kyndon ain jong katei ka Department.
Ki daw kiba pynlong iaka KSU Malki Circle ban phah khang noh iaka jingrung jingmih jong ki briew shapoh khlaw Malki ki bun, hynrei kiba ha khmat hi kidei ba ngi thmu ban pyneh pynsah iaki tyllong umdih,ba ngin pyneh pynsah iaka jingrben jong ka khlaw bad kawei patde kadei ka daw ba ngi kwah ban rad dyngkhong iaki kam awria bad ki kam ba i sait met ba shait leh da ki briew kiba wankai shane sha khlaw.
Kumba ngi tip hi, kane ka khlaw ka dei kaba pynbiang umdih umbam iaki hajar tylli ki longing hapoh shnong Malki. Ka ai um ruh iaki skul ba don hapoh shnong bad ia kawei ka Hospital kaba don ha shnong.
Ka ai um ruh iaki longiing bad ruh ia ophis sorkar kiba don ha Lachumiere manka sngi naduh mynshwa haduh mynta . Ka iai pynbiang iangi ka umdih namar ba ka rben ka khlaw. Lada ngim khang noh mynta iaka jingrung jong ki briew shane, ha kawei ka sngi ka khlaw kan sa stang bad ka nym lah shuh ban pynmih um kumne mynta.
Kadon ruh ka jingsyier iaki tyllong um namar ba teng teng kidon ki nongwankai kiba pynjot dusmon iaki tyllong bad iaki pipe um kiba don hapoh khlaw. Katno ka jingktah iaki longiing lada shah pynkdiah ki pipe bad lada shah pynjakhlia ka tyllong um.
Ka jingthmu ruh ka long ban pyneh pynsah ruh ia kine ki dieng bilat. Kine ki dieng bilat ki la don kumba 170 snem tam eiei katkum ka jingbatai jong ki ophisar ba trei ha Forests. Ki ai ka jingiada iaka shnong na ki eriiong kiba la wan tyllep iaka jylla haki por ba mynshwa.
Ki ai ruh iangi ka lyer kaba pyngngad bad kaba khuid.Ki nongwankai khamtam haka por tlang haba ki khriat ki ju phut da ki thalap jong kine ki kseh bilat ban thang ding ba kin syaid.
Kane ka ktah haduh katta katta ia kine ki dieng namar ba tang shu khlong lane lada ngi phut ia kine ki thalap kine ki dieng ki tlor bad hadien katno katne snem ki iap noh. Ki nong wankai patde kim tip ia kane ka jingshisha ki phut ki khlong katba ki mon ia ki thalap.
Ka daw kaba kongsan eh kadei ba la jyllei palat ki kam awria hangne hapoh khlaw. Naduh u snem 2021,Ka Seng ka la ioh bat ia kumba 20 ngut eiei ki Samla kiba wan dih drugs shane shapoh khlaw jongngi. Ka jingwan shongdih kyaid dih kynja lei te ka jur shaba palat.
Ha ka shisngi da ki spah ngut kiba wankai shane kidei ki nong wankai ban shongdih. Kane ka wanrah iaka jingbym shngaiń shuh iaki nongshong Shnong. Ki la don ruh ki jingjia ba ki nongshong shnong ki la shah jrong kti ha kum kine ki briew kiba la buaid. Ki don ruh ki jingjia kiba la kham shyrkhei kaba ki nongwankai ki leh .
Dang mynha kine ki khyndiat sngi ki don shi kynhun shi paralok bad kynthei bad shynrang ki wan dih kyaid shane, da la ia buaid la don kawei ka kynthei napdeng jongki kaba la iam sngewsih hapoh khlaw bad ka jingiam ka la poi sha ki skhor jong ki nongshong shnong Dong Lumbalang.
Ki nongshong shnong ki la mih ban leit peit iakata ka kynthei kaba iam bad unda ki la lap ia ka,ki la kylli Jia aiu? Kata ka kynthei ka la kynnoh ba ka la shah batbor ha kita ki Paralok shynrang kiba iawan kai lang. Namar ba ki la ia buaid palat Ki nongshong shnong ki la aiti noh ia kine ki briew sha ki pulit.
Ka Seng ka la lap ruh ia bun ki khynnah skul hapoh ka uniform,kiba wan shongkai shane sha khlaw haka por ba dang dei ban long skul. Ngi ju sneng ia kine ki khynnah lem bad ka jingmaham ba ki nym mliem ban pep skul khlem ka jingtip jong ki kmie ki kpa.
Lyngba kane ka kyrwoh ngi sngew dei ban iawer ia baroh ki nongshong shnong Malki ba ngin iatrei ryngkatlang haba iadei bad kane ka kam khnang ba ngin lah ban rad dyngkhong lut ia baroh ki jingsniew bad ki jingma kiba sdang ban mih khlieh hangne ha Shnong lyngba kane ka jingwan kai ki briew shane sha khlaw.
Ka KSU Malki Circle ka sngew ban ai khublei iaki Ophisers jong ka tnad Forests and Environment department bad kyrpang eh iaki Ophiser bad ki Forest Guard jong ka Malki Beat Forest.
