Shillong, Kyllalyngkot 21: Ka Khasi Students’ Union (KSU) Delhi Unit ka la ioh pdiang ïa ka jingïakyrpad ban ïarap na kawei ka khynnah kynthei na Meghalaya kaba la pyntip ba ka para jong ka, kaba trei ha Delhi ka la shah thombor bad shah shoh ha ki katto katne ngut ki shynrang ha ka jaka sah jong ka.
Hadien ba la ioh ïa kane ka jingtip, ka KSU Delhi Unit kala pyntip sha ka Special Police Unit for North-Eastern Region bad ryngkat bad ki pulit ka Malviya Nagar ki la poi sha katei ka jaka bad lah ban pyllait im ïa ka khynnah na kane ka jaka ba ka sah.
Katkum ka jingiathuh jong u ba shah kynnoh, u la ong ba kane ka khynnah kynthei kala shim pisa na u bad u la leit sha ka jaka sah jong ka namar ba kala kyntait ban pynphai pat ïa ka pisa.
Hynrei kane ka khynnah kynthei kala iathuh ha ki pulit ka long ba namar ba kala kyntait ban rung sha ka kam bymman bad dei na kane ka daw ba kala shah thombor ha kitei ki briew, mynta u ba thombor bad ba shah thohmbor ki don ha jingkhmih ki pulit.
Ka KSU Delhi Unit ka dang trei ryngkat bad ki bor ba dei peit ban pynthikna ba ïa kane ka khynnah yn phah biang sha ïing hadien ba la dep baroh ki jingdon kam katkum ka ain ha kaba ia dei bad kane ka jingjia.
Ka KSU Delhi Unit ka kyrpad ïa ka sorkar ba kan shim ïa ki sienjam kiba tyngeh ban khanglad ïa kum kine ki jingjia ha ki por ban sa wan, bad ka kyntu ïa ki paidbah, khamtam ïa kito kiba wad kam, ba kin pynshisha bha ïa baroh ki jingtip bad kin ïathuh shuwa ban leit trei shabar ka jylla.
