Shillong, Kyllalyngkot 09: U myntri rangbah ka jylla u Conrad K Sangma mynta ka sngi u la sam ia ki shithi thungkam sha ki 76 ngut ki pulit ha ka kyrdan Sub-Inspectors ha ka jingialang kaba la long ha 2nd MLP Battalion, Goeragre, Tura West Garo Hills District.
Haba kren ha kane ka jingialang u myntri rangbah la ong ba ki don haduh 21000 ngut hynrei kiba la poi sha ka thong ki long 76 ngut bad la ong ba kane ka dei ka juk ba ka jingiakop ka long kaba la jur bha.
La ong ba ki dei ban sngewthuh ia ka jingshaniah kaba ki paidbah kila ai ha ki pulit bad ki dei ban trei ia ka kam katkum ka jinganud jong ka sorkar, kiba ha iing ha sem bad ka jylla, namar na kitei kiba bun la shah jied tang 76 ngut.
U myntri rangbah u la ong ba ka kyrdan Sub-Inspector ka dei ka dur khmat jong ka tnad pulit namar ki dei maki kiba ia dei hapdeng ki paidbah bad ki pulit bad ba kin shim ia kano kano ka rai, la ong ba kim dei ban sngewpoh ia ka kyrdan kaba ki bat bad la kyntu ba kin long ki briew kiba ia jan bad ki paidbah.
Kiwei kiba la kren ha kane ka sngi ki long ka DGP ka kong Idashisha Nongrang IPS, u Chief Secretary ka jylla u Dr. Shakil P. Ahammed, IAS, ia ka jingkren ai khublei la kren da u Rituraj Ravi, IPS, Senior Superintendent ki pulit (TAP).
Na kine ki 76 ngut ki Sub Inspector, 49 ngut ki dei ki shynrang bad 27 ngut ki dei ki kynthei, kine ki pulit kiba shah thung thymmai kin hap ban leit sha hikai ha North Eastern Police Academy ban pyntibit ha ka kam pulit naduh ka 30/Kyllalyngkot/2026.
