New Delhi, Kyllalyngkot 05: u Ashwini Vaishnaw u la thoh “Haba ngi kren shaphang ka lawei jong ka pyrthei, ki dei ban wan shuwa ki rukom treikam kiba peit ia ka bha ka miat jong ki briew.”
Kine ki kyntien jong u Myntri Rangbah Duh Narendra Modiha ka ‘Summit of the Future’ba dang shen jong ka United Nations ki pyni ia ka jinglong tynrai jong ka India ban peit shuwa ia ka bha ka miat jong ki briew.
Kane ka la ialam lynti ia ki sienjam jong ngi ban wanrah ia ki kyndon Draft Digital Personal Data Protection (DPDP) Rules, 2025. Kine ki kyndon, ynda la pyndep ia ki, kin pyniaid ia ka Digital Personal Data Protection Act, 2023, ka ban pynurlong ia ka jingkut jingmut jong ngi ban iada ia ka hok jong ki briew ba kan don ka jingiada ia ka data jong ki.
Ki briew jong ka ri ki long ka mat ba kongsan jong ki kyndon DPDP Rules, 2025. Ha kane ka pyrthei kaba bun bha ka data mynta, ngi ngeit ba ka long kaba kongsan ban buh ia ki briew kum ka mat ba kongsan ha ka jingtreikam jong ka Sorkar.
Kine ki kyndon ki pynkupboria ki briew da ki hok kum ka jingai jingmynjur da kaba sngewthuhshai, ka jingpyndam ia ka data, bad ka lad ban jied ia ki briew ban shimti ia ka data.
Ki briew kin ym sngew shuh ba ym don lad haba kiwei ki pyndonkam ia ka data jong ki khlem da ioh jingbit.Kin don ki atiar ban iada bad pyniaid ia ka data jong ki.
Ia kine ki kyndon la saindur ha ka rukom kaba suk bad kaba shai, kaba pynthikna ba baroh ki briew jong ka India, khlem da peit ia kabor sngewthuh jong ki ia ka teknoloji, ki lah ban sngewthuh bad pyndonkam ia ka hok jong ki.
Naduh ka jingpynthikna ba la pan jingbit da kaba shai haduh ka jingpynikna ba la ai jingtip ia ki briew jong ka ri ha ka ktien Phareng lane kinokino na ki 22 tylli ki ktien ka India kiba don ha ka RitiSynshar, kane ka rukom treikam ka pyni ia ka jingkut jingmut ban ai bynta lang ia baroh.
Ki khynnah ki donkam ia ka jingiada kaba kyrpang ha kane ka juk digital. Da kaba ithuh ia kane, kine ki kyndon ki pynthikna ba ki kmie ki kpa ne ki nongsumar ki hap ban ai ka jingbit shuwa ban pyndonkam ia ka data jong ki khynnah bym pat kot 18 snem ka rta.
Kiwei kiwei ki bynta ki pynthikna ka jingiadaia ki khynnah na ka jingshah pyndonkam bakla, ka jingai jingtip khlem da pan jingbit, bad kiwei kiwei ki jingma ha ki kam digital. Kine ki bynta ki pyni ia ka jingkut jingmut jong ngi ban wanrah ia ka kam digital ba kham shngain ia ki pateng ban wan.
Ka ioh ka kot na ki lad digital jong ka India ka la dei ka jingjop ha ka pyrthei, bad ngi la kut jingmut ban pyntyllunshakhmat ia kane. Kane ka rukom treikam ka pynthikna ia ka jingiada ia ka data jong ki briew ha ryngkat ka jingplie lad ia ka jingsaindur thymmai ha ka ioh ka kot kaba iadei bad ki kam digital.
Ha ka jingiapher ha ki rukom treikam ha kiwei kiwei ki ri kiba ba jur halor ka jingbuh ia ki kyndon kiba khlain, ka rukom treikam jong ngi ka dei kaba kham noh sha ka jingplie lad na ka bynta ka roi ka par. Kane ka jingryntih ka pynthikna ba ki briew jong ka ri ki ioh jingiada khlem da pynkylla ia ka mynsiem ban saindur thymmai kaba aibor ia ki startup bad ki kam khaii pateng jong ngi.
Ki kam khaii barit bad ki startup kin kham duna ki kamram ba ki hap ban pyndep. Ia kine ki kyndon la saindur ha ryngkat ki jingbahkhlieh, da kaba peit ia ka bor bapher bapher jong kito kiba iadon bynta ha kane ka kam. Ki kompani ba kham heh, katkum ka jingpeit ia ki data fiduciary, kin kham bun ki kamram ba ki hap ban pyndep kaba wanrah ia ka jingbahkhlieh khlem da ktah ia ka jingkiew shaphrang.
Ha ka nongrim jong kine ki kyndon ka dei ka rukom peit ‘digital ha ka jingsaindur’. Ka Data Protection Board, kaba peit ia ki jingpynbeit ia ki jingeh bad pyntreikam ia ki kyndon, kan treikam kum ka ophis digital.
Da kaba pyndonkam ia ka teknoloji, ngi wanrah ia ka jingseisoh, ka jingshai bad ka jingsted treikam. Ki briew jong ka ri ki lah ban buh jingujor, buddien ia ki kam bad pan ia ki jingpynbeit khlem da hap leit mih hi dalade.
Kane ka rukom treikam da kaba pyndonkam shuwaia ki lad digital ka pyniar ia ka jinghap ban ioh jingbit bad ka jingtyllun ki kam ban pyniaid ia ka data. Da kaba pyniaid ryntihia ka kam, ngi pynsuk ia kito kiba trei ha ki kam data ba kin bud ia ki kyndon bad ruh ia ki briew ba kin iadon bynta kaba wanrah ia ka jingshaniah ia ka rukom treikam.
Ka jingiaid lynti sha ka jingwanrahia kine ki kyndon ka dei kaba la ai bynta lang ia baroh. Ha ka jingdon nongrim ha ka Digital Personal Data Protection Act, 2023, kine ki kyndon ki mih na ki jingai jingmut jong ki briew kiba iadon bynta ha kane ka kam bad ka jingpeit ia ki rukom treikam ha kylleng ka pyrthei.
Ngi la sdang ia ki 45 sngi jong ka jingai jingmut ki paidbah, ki kompani bad ka imlang sahlang ha kaba ngi khot ia ki briew ba kin ai ki jingmut jong ki. Kane ka dei ka dak jong ka jingngeit jong ngi ha ka jingshemphang jong baroh bad ka jingkongsan jong ka jingwanrah ki polisi ha kaba baroh ki iadon bynta lang, ha ryngkat ka jingpynthikna ba kane ka mat treikam ka long kaba khlain bad kaba lah ban iahap bad ki jingeh ba kyrpang jong baroh ka imlang shlang bad ki kam kiba iadei bad ka ioh ka kot.
Ban pynthikna ba ki briew jong ka ri ki sngewthuh ia ki hok jong ki, ngin pynlong ia ki prokarm ai jingtip ba iar ban hikai ia ki briew shaphang ki hok jong ki ha kaba iadei bad ka data jong ki.
Katba ngi dang pyllait ia kine ki kyndon, ngi dang pynbeit ia ki jingeh kiba don mynta bad ngi buh ia ka nongrim na ka bynta ka lawei kaba shngain ha kaba iadei bad ka data.
Ki kyndon Draft Digital Personal Data Protection Rules, 2025, ki pyni ia ka jinglong nongialam ka India ha ka jingwanrah ia ka jinglong jingman ha ka pyrthei ha kaba iadei bad ka jingpeit ia ka data.
Da kaba phaikhmat shuwa sha ka bha ka miat jong ki briew bad ka jingwanrah ia ka jinglong jingman kaba plie lad ia ka jingsaindur thymmai, ngi dang buh nuksa ia ka pyrthei ba kan bud.
Ka jingkut jingmut jong ngi ka long kaba shai: ban iada, pynkupbor bad plie lad ia baroh ki briew jong ka India ha kane ka juk digital mynta. Nga pynshlur ia baroh ki briew jong ka ri, ki kompani bad ki kynhun ha ka imlang sahlang ba kin iashim bynta ha kane ka jingiamir jingmut da kaba ai ki jingmut jong ki ha kane ka por ba la buh na ka bynta kane.
Ha ka jingiatreilang, to ngin pynbha shuh shuh ia kine ki kyndon bad tei ia ka mat treikam kaba pyni ia ki jingthmu ban don ka India kaba shngain, kaba plie lad lang ia baroh ha ki kam digital. U nongthoh u dei u Myntri Sorkar Pdeng ba dei khmih ia ki tnad Electronics and Information Technology, Information bad Broadcasting, bad Railways.
