Shillong, Nailar 24: Ka Madan S&CC ka la long ka lahduh ha ka lympung ialehkai under- 20 jong ka Fourth Division League 2024 ba la pyniaid da ka Shillong Sports Association (SSA) ha dien ba ka la lah ban pynliem noh ia ka UmRynjah Sports Club da 2- 1 kol ha ka jingiakhun final ka ba la long mynta ka sngi ka 24 tarik u Nailar 2024 ha madan 1st Ground Polo, Shillong.
Ia kane ka namjop jong ka Madan S&CC ka la wan urlong lyngba ki kol ia ka ba la thep da u Jason T Malsamtluanga u ba la thep ha ka minute ka ba 41, kat ba ia ka Kol ba ar na ka bynta Madan S&CC la ioh ban thep da u Phermanbha Lyngdoh ha ka minute ka ba 48.
Ha ba phai sha ka UmRynjah ka ba la ialeh shitom ban ioh ban pynphai ia ka 1 kol lyngba u Samborlang Jyrwa ha ka minute ka ba 63.
Ka Madan S&CC bad ka Um Rynjah SC ki la ioh ban kyntiew kyrdan ialade sha ka 3rd Division jong ka SSA ki ban ioh ban ia shim bynta na duh u snem u ban wan kata u 2025.
Ha kane ka sngi la wan ban sam ia ki khusnam sha ki nongjop da u bah Banteidor Lyngdoh u ba dei ruh u President ka SSA ha ryngkat ka jingia don lang u bah B Diengdoh, u bah SS Rapthap ki ba long ki Secretary ba rim ka SSA lem bad kiwei kiwei pat ki para dkhot jong ka SSA.
