New Delhi, Rymphang 03: Ka Mang Tyngka jong ka Sorkar Pdeng ka la pynskhem ïa ka jingangnud jong ka Sorkar India na ka bynta ka roi ka par jong ka Meghalaya da kaba kyntiew ïa ka jingkyrshan pisa lyngba ka bhah kaba kham heh hapoh ka jingiasam ia ka khajna bad ka jingkyntiew ïa ka jingmang pisa hapoh ka Special Assistance to States for Capital Investment (SASCI), kaba kyrshan ïa ka Jylla ban pynsted ïa ka jingpynlut pisa bad ka jingthaw ïa ki jingdon jingem.
Katkum ka jingkheiñ jong ka Mang Tyngka na ka bynta u snem 2026–27, ïa ka Meghalaya la mang T.9,631 klur hapoh ka bhah kaba kham heh hapoh ka jingiasam ia ka khajna, kaba ai ïa ki lad jingïarap kiba kham heh ban kyrshan ïa ki jingthmu na ka bynta ka roi ka par jong ka Jylla.
Hapdeng u snem 2014 bad 2024, ka jingphah pisa na ka Sorkar Pdeng sha ka jylla Meghalaya ka la kiew bha, ha kaba T.69,339 klur la pyllait kum ka bhah kaba kham heh hapoh ka jingiasam ia ka khajna bad T.40,452 klur kum ka jingai jingiarap, kaba pyni ia ka jingpyniar kaba iaineh ha ka jingkyrshan pisa na ka Sorkar Pdeng.
Ka Mang Tyngka jong ka Sorkar Pdeng ka la pynkhlain ruh ia ka jingbei tyngka lyngba ka SASCI, ha kaba la ai ram khlem jingsiew sut na ka bynta 50 snem sha ki Jylla, ha kaba ia ka jingsiew ia ka sut baroh la bah da ka Sorkar Pdeng, halor ki jingai jingmut jong ka Finance Commission.
Hapoh kane ka skhim, ka jylla Meghalaya ka la ïoh T.6,523 klur naduh u snem 2020–21 haduh u snem 2025–26 (haduh u bnai Kyllalyngkot 2026), ha kaba ki jingpyllait pisa man la u snem ki nang kiew, kaba iarap ban pyntreikam kham kloi ïa ki projek ba kongsan bad ka jingthaw ia ki jingdon jingem.
Ka jingkyrshan jong ka Mang Tyngka ka la pynkylla sha ka jingkyntiew ia ki jingdon jingem kiba lah ban iohi ha ka jylla Meghalaya. Ha kaba iadei bad ki surok, palat 1,156 km ki surok bah ladep shna ha ka Jylla haduh ka 30 tarik Jylliew 2025.
Hapoh ka Bharatmala Pariyojana, la mynjur ban shna ia ki National Highway corridor kiba jrong 170 km ha ka jinglut ba la antad ha ka T.2,703 klur. Shuh shuh, ha ka 24 tarik Risaw 2024, ka Tnad pynroi jaka nongkyndong ka la mynjur ïa 88 tylli ki surok kiba heh 782 km bad 55 tylli ki jingkieng hapoh ka PMGSY-III, ha kaba la antad ba ka jingbei tyngka kan long T.1,056 klur. Ha kaba iadei bad ki lynti rel, la wanrah ïa ka jylla Meghalaya ha ka kam rel ha u snem 2014 da kaba pyntreikam ïa ka lynti rel Dudhnoi–Mendipathar.
Ka Jylla ka la ïoh ïa ka jingshakri jong ki rel elektrik ha ka sien kaba nyngkong ha u Lber 2023, bad mynta baroh kawei ka Meghalaya, ryngkat bad ka Nagaland, ki la ïoh bording elektrik. Ia ka steshon rel Mendipathar dang pynbha thymmai hapoh ka skhim Amrit Bharat Station.
Ka thain shatei lammihngi baroh ka la ioh jingmyntoi na ka jingkiew kaba jur ha ka mang tyngka ba iadei bad ki kam rel, kaba la kiew na ka jingkhein kyllum kaba T.2,122 klur ha u snem 2009–14 sha ka T.10,440 klur ha u snem 2025–26, kaba la kiew jan san shah.
Ka jingpyniasoh liengsuin ruh ka la kiew da ka jingpyntreikam ia ka kad liengsuin jong ka Shillong hapoh ka skhim RCS-UDAN, da kaba pyntreikam ia 8 tylli ki jingpynher liengsuin kiba thymmai. Ia ka kad liengsuin jong ka Shillong la kynthup ruh hapoh ka Krishi Udan Scheme ban pynsuk ia ka jingkit ia ki mar rep bad ban kyrshan ia ki nongrep.
Ha ka liang ka pule puthi, ïa u maw nongrim na ka bynta ka Indian Institute of Corporate Affairs la buh ha IIM Shillong ha u bnai Naitung 2025, bad la sdang ïa ka Gati Shakti Research Chair ba nyngkong eh jong ka India ha kane ka jaka pule.
Ka kam jngohkai pyrthei bad ki jingdon jingem ha ki jaka sor ki la ioh ia ka jingkyrshan ba kyrpang ha ka mang tyngka, ha kaba palat T.29 klur la mynjur hapoh ka skhim PRASAD bad palat T.184 klur la mynjur hapoh ka skhim Swadesh Darshan na ka bynta ban kyntiew ia ki jingdon jingem ba iadei bad ka kam jngohkai pyrthei.
La mynjur ia artylli ki projek hapoh ka Swadesh Darshan Scheme 2.0 ha Meghalaya, kynthup ia ka Meghalaya Age Cave Experience ha Sohra ha ka jinglut kaba palat T.32 klur bad ka Waterfall Trails Experience ha Sohra ha ka jinglut kaba jan T. 28 klur.
Ia ka Polo Shopping Complex la plie paidbah ha nongbah Shillong ha u bnai Naitung 2025, kaba la nang pynkhlain shuh shuh ia ki jingdonkam ha ki jaka sor. Ka nongbah Shillong ruh ka la shah jied hapoh ka Smart Cities Mission.
Ia ka jingkyntiew ia ki karkhana bad ki jingdon jingem ba kyrpang ha Meghalaya la kyrshan lyngba katto katne ki skhim ba la kyrshan da ka sorkar pdeng. Ka kynhun myntri jong ka sorkar pdeng ka la mynjur ia ka skhim Uttar Poorva Transformative Industrialisation, UNNATI–2024, ha kaba la pynlut T.10,037 klur na ka bynta ka samoi kaba 10 snem ban kyntiew ia ki kam karkhana bad ka jingpynmih ia ki lad ioh kam ha ka thain shatei lammihngi.
Hapoh ka North East Special Infrastructure Development Scheme, 14 tylli ki projek kiba la mynjur ban pynlut palat T.569 klur la mang sha ka jylla Meghalaya. Naduh ba la sdang ïa kane ka skhim, la ai jingmynjur ïa hynniew tylli ki projek surok bad ki jingkieng kiba shongdor T.459 klur bad 116 tylli kiwei pat ki projek ba iadei bad ki jingdon jingem kiba shongdor palat T.1,737 klur ha ka Jylla.
Ka PM-DevINE, kaba la pynbna ha ka Mang Tyngka jong ka sorkar pdeng 2022–23 kum ka skhim kaba la bei tyngka pura da ka sorkar pdeng, ka la kyrshan ia ki projek ha ka jylla Meghalaya ba kynthup ia ka surok four-lane bad ka jingkyntiew ia ki surok kiba la don lypa ha New Shillong Township, ka jingshna ia ka skywalk bad ka jaka jngohkai pyrthei ha Mawkdok ha Sohra, bad ka jingshna ia ka IT Park ha Tura ha West Garo Hills District.
Nalor kata, ha ka 9 tarik Lber 2024, u Myntri Rangbahduh u la plie paidbah bad buh maw nongrim na ka bynta ki projek ba bun kiba shongdor palat T.290 klur ha ka Jylla, kynthup ïa ka jingbuh maw nongrim na ka bynta ka IT Park ha Tura, ka surok four-lane kaba thymmai bad ka jingkyntiew ia ka surok two-lane kaba la don lypa ha New Shillong Township, bad ka jingplie paidbah ia ka Farmers Hostel-cum-Training Centre ha Upper Shillong.
Ka jingkyrshan jong ka Mang Tyngka jong ka sorkar pdeng ka la iarap ruh ban pynpoi ïa ki skhim ba kongsan ba iadei bad ka bha ka miat ha ka jylla Meghalaya. Haduh u Kyllalyngkot 2026, la plie palat 8.98 lak tylli ki PM Jan Dhan account, 6.28 lak tylli ki jingpynrung kyrteng hapoh ka PM Jeevan Jyoti Bima Yojana, 10.9 lak hapoh ka PM Suraksha Bima Yojana, bad ki ram kiba kot sha ka T. 3.33 hajar klur ba la pyllait hapoh ka PM MudraYojana.
Ka Jylla ka don palat 92.5 hajar ngut kiba don hapoh ka Atal Pension Yojana, 5.83 hajar tylli ki aplikeshon PM SVANidhi ba la dep ban ai, 94 hajar tylli ki Kisan Credit Card ba la ai, bad 5.42 lak tylli ki longïing ha ki jaka nongkyndong ki la ioh ïa ki um kor hapoh ka Jal Jeevan Mission.
Nalor kata, palat 3.17 lak tylli ki connection LPG la pyllait hapoh ka PM Ujjwala Yojana, palat 21.3 lak tylli ki Ayushman card la pynbiang, palat 21 lak ngut ki nongïoh jingmyntoi kiba la kynthup hapoh ka PM Garib Kalyan Anna Yojana, bad palat 1.79 lak ngut ki nongrep kiba la ioh jingkyrshan hapoh ka PM-KISAN.
