Shillong, Iaiong 11: Ka jingwan jngoh ïa ka Jylla Meghalaya kaba ar sngi da u Sanjay Jaju, Secretary ka Tnad North Eastern Region (MDoNER), ka la sdang da ka jingïalang bishar bniah kaba hakhlieh duh kaba la
pynlong ha Meghalaya Secretariat ryngkat u Chief Secretary bad ki heh ophisar jong ka Sorkar Jylla.
Ka jingialang ka la pynleit jingmut ha kaba bishar bniah ia ka jingiaid shaphrang ki sienjam ba kongsan ba iadei bad ka roi ka par bad ban pynkhlain ia ka jingiatreilang hapdeng ka Sorkar Pdeng bad ka Sorkar Jylla ban pynsted shuh shuh ia ka roi ka par jong ka thain.
Ha ka jingialang, u Secretary u la bishar bniah ia ka thup jong ki projek ba la mynjur hapdeng ki snem mang tyngka ba ladep.
Ia kane ka thup treikam kaba khlain la ialam da ka Prime Minister’s Development Initiative for North East Region (PM-DevINE), kaba bei tyngka ia ki katto katne ki projek kiba heh. Kiba kongsan napdeng kine ki long ka jingshna ia ka surok four-lane kaba thymmai ha New Shillong Township bad ka jingtei ia ka IT Park ha Tura.
La bei tyngka ruh sha ka kam jngohkai pyrthei, kynthup ia ka ropeway ba kit ia ki nongleit nongwan ha Shillong Peak bad ka skywalk bad ka jaka jngohkai ha Mawkdok. Ka jingkyntiew ia ka Sohra Tourism Circuit kalong kum ka sienjam ba kongsan hapoh ka PM-DevINE, kaba kynthup ia ki projek ba kyrpang kiba thmu ban pynneh pynsah ia ka pateng bad ban kyntiew ia ka jingsngew jong ki nongwan jngohkai.
Ki bynta ba kongsan ki kynthup ia ka Khasi Heritage Experiential Centre ha Saitsohpen, ka jingkyntiew ia ka thain Nohkalikai Falls bad ka Mawsmai Eco Park. Kiwei pat ki jingpynbha ki dang ïaid shakhmat.
Ha wah Shella Nohsngithiang Falls, Krem Mawsmai, Wahkaliar Canyon, Krem Arwah bad Wah Kaba Fall khnang ban pynthikna ïa ki jingdon jingem kiba katkum ka juk mynta ha kane ka thaiñ.
Hapoh ka North East Special Infrastructure Development Scheme (NESIDS)-Roads bad ka
NESIDS-OTRI (kiwei pat ki jingdon jingem kiba lait na ki surok), ka jylla ka pyniaid ia ki kiwei kiwei ki kam kiba iadei bad ka roi ka par.
Ka bynta jong ka OTRI ka kynthup ia ki jingdon jingem kiba kongsan ha ka imlang sahlang kum ka Bulk Water Supply Scheme na ka bynta ka sor Tura bad ka Greater Baghmara Water Supply project. Katba ki jingdon jingem ba iadei bad ki surok ki
dang long kiba kongsan tam ha ryngkat ki projek kiba heh kiba la mynjur, kynthup ïa ka jingpynbha ïa ka bynta na Chokpot haduh Kharukol, ka jingshna ïa ka surok na Shkentalang sha Lumshyrmit kynthup ïa ka jingkieng kaba kongsan ha ka wah Myntdu bad ka jingkieng kaba kongsan halor ka wah Umngot.
Haba ai jingkren sha ki heh sorkar, u Sanjay Jaju u la pynpaw ia ka jingsngewnguh kaba khraw ïa ka jingkiew shaphrang ha ka thaiñ Shatei Lammihngi, da kaba ong ba ka jingstet jong ka roi ka par ka wanrah ia ka jingkmen. Da kaba shim na ka jingshem jong u bad ka National Highways bad Infrastructure Development Corporation Limited (NHIDCL), u la kren shaphang ki jingkiew ha ki
jingdon jingem, ka jingpyntreikam ia ki projek bad ka jingkiew ka ioh ka kot ha kylleng ka thain.
U Jaju u la ban jur ia ka jingkiew kaba lah ban iohi ha ki jingdon jingem ba iadei bad ki surok, kynthup ia ki bypass ba thymmai, kumjuh ruh ka jingtei ia ki jingdon jingem ba kongsan na ka bynta ki paidbah kum ki Secretariat, ki jaka wad bniah, ki hospital bad ki library.
U la ban jur ba ka jingïalam kaba khlaiñ na ka Sorkar Jylla ka la don ka bynta kaba kongsan ha kaba kyntiew ïa ka roi ka par bad jingkiew jong ka ïew ka hat.
U la ong ba u ngeit skhem ba ka thain shatei lammihngi ka lah ban ioh ia ka jingroi kaba iaineh ha kine ki ar snem ban wan da ka jingiai kyrshan jong ki nongialam. Haba pdiang ia ki jingeh kum ka jingdon jaka na ka bynta ki projek ba iadei bad ki kam karkhana, u la ban jur ba ka jingkiew
jong ka kam pynpoi mar bad ka lad ba don ha ki kam ba iadei bad ki siej bad u shynrai ka pyni ia ka lawei kaba bha ha ka ioh ka kot jong ka Meghalaya.
